Бори нахуст мақомоти амрикоӣ барномаи бозгашти ихтиёрии муҳоҷирони ғайриқонуниро, ки бо номи “худдепортатсия” маъмул аст, амалӣ намуданд. Нахустин парвози ҳавопаймои чартерӣ бо 64 муҳоҷир аз Хюстони Амрико ба Гондурас ва Колумбия парвоз кард. Дар ин бора мақомоти амнияти дохилии Амрико хабар доданд.

Тибқи иттилоъ, ба ҳар як муҳоҷири ихроҷшуда билети парвози ройгон, пардохти маблағи якдафъина дар ҳаҷми 1000 доллар дода шуд. Илова бар ин, ба онҳо дар бораи бозгашти дубора бо роҳи қонунӣ ба Амрико ваъда дода шудааст.

Гондурас ба 38 нафар муҳоҷири ихроҷшуда 100 долларӣ ва хӯрока дода, ваъда дод, ки онҳоро бо ҷойи кор таъмин хоҳад кард. 26 муҳоҷири дигаре, ки ба Колумбия фиристода шуданд, аз мақомоти ин кишвар кумакҳои иҷтимоӣ дарёфт кардаанд.

Бар асоси иттилои расонаҳо тақрибан нисфи онҳое, ки аз Амрико ба Гондурас ихроҷ мешаванд, кудакон буда, дар Амрико таваллуд шудаанд ва шаҳрвандии ин кишварро доранд.

Ҳукумати Доналд Трамп бар асоси сиёсати нави муҳоҷират барномаи ихроҷи муҳоҷирони ғайриқонунӣ дар Амрикоро амалӣ мекунад. Мақомоти амрикоӣ дар доираи ин барнома ҳазорон нафарро аз хоки Амрико ба кишварҳояшон ихроҷ кардаанд.

Dialog.tj