Лука Модрич, яке аз таърихсозони футбол, нимҳимоятгари бошгоҳи “Реал Мадрид” пас аз 13-соли фаъолияти пурсамар дар дастаи шоҳона эълон кард, ки ин тобистона баробари ба охир расидани шартномааш бошгоҳро тарк мекунад.

“Замоне расид, ки аз расиданаш метарсидам, аммо ҳар оғоз анҷом дорад ва анҷоми кори ман дар беҳтарин дастаи дунё - “Реал Мадрид” фаро расид. Ман дар ҳайати ин даста ҳама ҷоизаҳоро ба даст овардам, аммо пеш аз ҳама инсониятро шинохтам ва худамро тағйир додам. Рӯзи 24-уми май охирин бозиамро дар майдони хонагӣ “Сантяго Бернабеу” баргузор мекунам”, - навиштааст Лука Модрич.

Варзишгари 39-солаи хорватӣ доир ба корномаи баъдиаш чизе нагуфтааст. Ӯ ишораи аз футбол рафтану қатъи корномаашро накардааст ва ҳамчунин, то ҳол аз ҳеч дастае пешниҳоди ҳамкорӣ нагирифтааст.

Гуфта мешавад, ки Лука Модрич дар Чемпионати бошгоҳҳо, ки аз нимаи моҳи июн то нимаи моҳи июл дар Амрико баргузор мегардад, иштирок мекунад.

Дар пасманзари номаи Модрич ҳамдастаҳои ҳозираву собиқаш аз ӯ миннатдорӣ карда, дар корҳои минбаъдааш бурдбориҳо хостаанд.

Футболбози 39-солаи хорватӣ соли 2012 ба дастаи шоҳона пайваста, 590 бозӣ анҷом додааст. Давоми ин солҳо ҳама ҷоизаҳои арзишмандро ба даст овардааст. Аз ҷумла, 6 Лигаи қаҳрамонҳо, 6 Чемпионати бошгоҳҳо, 5 Суперҷоми Аврупо, 4 Ла Лига, 2 Ҷоми шоҳ ва 5 Суперҷоми Испанияро ба даст овардааст.

Лука Модрич ҷоизаҳои инфиродӣ низ хеле зиёд ба даст оврадааст, ки аз ҳама муҳиму арзишмандаш “Туби Тиллоӣ” дар соли 2018 аст.

Dialog.tj