Президенти Иёлоти Муттаҳидаи Амрико Доналд Трамп қонунеро имзо кард, ки тибқи он нашри акс ва видеоҳои ошкорои ҷинсӣ (порнографӣ)-и сохта ё воқеии бидуни розигии ашхоси дар он тасвиршуда ҷиноят шуморида шуда, манъ мешавад. Бар асоси ин қонун, нашри аксу навори порнографии дипфейк дар фазои интернет ҷиноят маҳсуб шуда, ҷавобгарии ҷиноӣ дар пай хоҳад дошт.

Ин нахустин қонунест, ки истеҳсоли аксу навори порнографӣ бо зеҳни сунъӣ дар Амрикоро ҷиноят мешуморад.

Тибқи ин қонун нашри муҳтвои порнографӣ бидуни иҷозати қаҳрамони он ҷиноят маҳсуб мешавад ва паҳнкунандагони он бо ҷазои ҷиноятӣ, аз ҷумла ҳабс, ҷарима ва пардохти зарари расонида шуда ба ҷабрдадагон рӯ ба рӯ хоҳанд шуд. Ин қонун, ҳамчунин, афроде, ки чунин видеаҳоро барои шантаж ва ё тарсонидану таҳдид истифода мекунанд, мавриди пайгарди қонунӣ қарор медиҳад.

Коммисияи федеролии тиҷорати Амрико бар асоси ин қонун сомонаҳои интернетиро вазифадор мекунад, ки баъди 48 соати шикояти ҷабрдидагон акс ва наворҳо онро ҳазф намоянд.

Ҳамсари президенти Амрико Милания Трамп, ки дар маросими имзои ин қунун дар Кохи сафед ҳузур дошт, аз хушунат ва озори занон ба воситаи истеҳсоли чунин аксу наворҳои порнографӣ интиқод карда гуфт, ки “шумори зиёди занон бо тасвирҳои дипфейк ва ошкорои ҷинсӣ, ки бе розигии онҳо истеҳсол ва паҳн шудаанд, мавриди озор ва азият қарор гирифтаанд. Ин озору азиятро аз имрӯз ғайриқонунӣ эълон мекунам”.

Ёдовар мешавем, ки ин қонун моҳи гузашта дар Маҷлиси намояндагон ва Сенати Амрико қабул шуд. Тибқи гуфтаи тарафдорони ин қонун, агарчи аксари иёлотҳо қонунҳои махсус барои манъи сабту нашри чунин аксу тасвирҳои сохтаро доранд, вале ин қонун аз рӯйи муайян намудани сатҳ ва мизони ҷиноят фарқ мекунад.

Дар ҷаҳон Кореияи Ҷанубӣ нахустин кишваре буд, ки нашри порнографияи дипфейкҳоро ҷиноят ҳисоб кард. Бар асоси қонун дар Кореяи Ҷанубӣ онҳое, ки ба сохтан ва нашри дипфейкҳои порнографӣ даст мезананд, ба 5 сол зиндон ва пардохти ҷаримаҳои ҳангуфт вазифадор мешаванд.

Dialog.tj