АМИТ «Ховар» хабар медиҳад, ки дар Муассисаи давлатии «Телевизиони Сафина» бахшида ба Соли байналмилалии ҳифзи пиряхҳо (2025) ва Конфронси байналмилалии сатҳи баланд оид ба ҳифзи пиряхҳо (29-31 май) се филми мустанад, аз ҷумла «Таназзули пиряхҳо», «Сарвати башарӣ» ва «Ванҷях», инчунин, барномаҳои гуногуни экологӣ таҳия ва пахш гардиданд.

Тибқи иттилои манбаъ, мавзуи филмҳои мазкур таърихи омӯзиш ва вазъи пиряхҳои Тоҷикистон буда, ҳаҷмашон тақрибан 30-дақиқаӣ аст ва зернависи забони англисӣ доранд.

Гуфта мешавад, ки вобаста ба ин масъала бо Вазири корҳои хориҷии Ҷумҳурии Тоҷикистон Сироҷиддин Муҳриддин мусоҳибаи ихтисосӣ анҷом дода шудааст ва илова бар ин, дар барномаҳои телевизионӣ суҳбату вохӯриҳо бо олимону донишмандон ва мутахассисони соҳа оид ба ҳифзи пиряхҳо доир гардидааст.

Бояд гуфт, ки дар доираи Соли байналмилалии ҳифзи пиряхҳо, ки бо ташаббуси Президенти Ҷумҳурии Тоҷикистон муҳтарам Эмомалӣ Раҳмон пешбарӣ гардидааст, аз 29-ум то 31-уми майи соли равон дар шаҳри Душанбе Конфронси байналмилалии сатҳи баланд оид ба ҳифзи пиряхҳо баргузор мегардад.

Dialog.tj