Ҳайати афғонистонӣ зери роҳбарии Абдулборӣ Умарӣ, раиси ширкати Брешнои Афғонистон барои ширкат дар нишасти лоиҳаи интиқоли САSА-1000 ба Душанбе омада, бо масъулони Вазорати энергетика ва захираҳои оби Ҷумҳурии Тоҷикистон мулоқот намуд.

Тибқи иттилои Вазорати энергетика ва захираҳои оби Тоҷикистон намояндагони ширкати Брешнои Афғонистон бо мақомоти тоҷикистонӣ мулоқот намуда, масъалаи суръат бахшидан ба корҳои бунёди лоиҳаи САSА-1000 ва дигар масъалаҳои ҳамкориҳои дуҷонибаро мавриди баррасӣ қарор доданд.

Тибқи иттилоъ, дар нишасти минтақавии САSА-1000 намояндагони Тоҷикистон, Қирғизистон, Покистон, Бонки ҷаҳонӣ, Бонки рушди исломӣ ва дигар ниҳодҳои байналмилалӣ ширкат намудаанд.

Ширкати Брешнои Афғонистон, ки ҳоло зери назорати Толибон аст, бо нашри як хабар эълон кард, меҳвари аслии нишасти САSА-1000 баррасии вазъияти имрӯзаи лоиҳа, мушкилот, роҳи ҳалҳо ва барномарезӣ дар хусуси амалӣ сохтани марҳилаи баъдии лоиҳа аст.

Лоиҳаи САSА-1000 яке аз бузургтарин лоиҳаҳои минтақавӣ барои интиқоли барқ аз Осиёи Марказӣ, аз ҷумла Тоҷикистон ва Қирғизистон ба Осиёи Ҷанубӣ аст ва масири он аз хоки Афғонистон мегузарад.

Эмомалӣ Раҳмон, президенти Тоҷикистон ва Содир Ҷабборов, президенти Қирғизистон дар охирҳои моҳи марти соли ҷорӣ дар вилояти Суғд хати интиқоли барқро ба истифода доданд, ки як қисми лоиҳаи САSА-1000 мебошад.

Dialog.tj