Маркази матбуоти Вазорати маориф ва илм хабар медиҳад, ки Раҳим Саидзода, вазири маориф ва илми Ҷумҳурии Тоҷикистон дар Чин дар доираи нахустин ҷаласаи вазирони маорифи кишварҳои Чин ва Осиёи Марказӣ бо муовини вазири маорифи Ҷумҳурии Мардумии Чин У Ян вохӯрӣ намуд.

Дар вохӯрии мазкур гуфта шуд, ки дар ҳоли ҳозир дар муассисаҳои таҳсилоти олии касбии Ҷумҳурии Мардумии Чин зиёда аз 5000 донишҷӯи тоҷик таҳсил доранд, ки ин далели равшани рушди робитаҳои мутақобилан судманд дар самти маориф мебошад.

Инчунин, Раҳим Саидзода иброз дошт, ки бо афзоиши талабот ба мутахассисони самтҳои инноватсионӣ, ҷалби бештари донишҷӯёни тоҷик ба таҳсил дар донишгоҳу донишкадаҳои Чин, махсусан дар самти технологияҳои иттилоотӣ ва зеҳни сунъӣ, аҳамияти аввалиндараҷа дорад.

Ҳамзамон, ба фаъолияти Пажӯҳишгоҳи Конфутсий, ки дар назди Донишгоҳи миллии Тоҷикистон амал мекунад, баҳои мусбат дода шуда, он ҳамчун намунаи муваффақи ҳамкориҳо дар самти фарҳангу маориф арзёбӣ гардид.

Dialog.tj