Созмони Милали Муттаҳид бо изҳори нигаронӣ мегӯяд, ки беш аз 10 моҳ боз Исроил иҷозаи ворид кардани ғизо, об, дору ва хаймаро ба минтақаи Ғазза намедиҳад ва ин боиси фоҷеаи башардӯстона дар ин минтақа шудааст.

Том Флетчер, муовини Дабири кулли Созмони Милали Муттаҳид дар умури башардӯстона дар нишасти Шурои амнияти ин созмон эълон кард, ки беш аз даҳ ҳафта боз ғизо, дору, об ва хайма ба Навори Ғазза ворид нашудааст ва фоҷеаи башариро барои 2,1 миллион сокини минтақа ба вуҷуд овардааст.

Муовини Дабири кулли Созмони Милали Муттаҳид Том Флетчер бо интиқоди шадид аз сиёсатҳои Исроил ба зарурати қатъи “барқасдона ва бешарафонаи” таҳмили шароити ғайринсонӣ ба ғайринизомиёнро таъкид намуда, ҳушдор дод, ки миллионҳо фаластинӣ дар хатари гуруснагӣ ва қаҳтӣ қарор доранд. Ӯ таъкид кард, дар ҳоле, ки кумакҳо дар марзҳои Ғазза боздошта шудаанд, Исроил дастрасӣ ба ин минтақаро маҳкам карда ва ҳадафаш таҳдид ба ҷони мардум аст.

Том Флетчер афзуд, ки Исроил кумакҳои башардӯстонаро барои ҳадафҳои сиёсӣ ва низомӣ ба кор мебарад ва бар хилофи қонунҳои байналмилалӣ амал мекунад. Ӯ ба афзоиши хушунатҳо бар минтақаи Каронаи Бохтарӣ ишора карда, аз идомаи бунёд ва густариши шаҳракҳои ғайриқонунӣ ва ҳамлаҳо ба сокинони он хабар дод. Мавсуф аз Шурои амнияти СММ хост, ки аз поймолшавии пай дар пайи қонунҳои байналмилалӣ вокуниш нишон диҳад.

Том Флетчер дар вокуниш ба хушунат ва қатл дар Фаластин аз ҷомеаи ҷаҳонӣ хост “инсоният, қонун ва ақл” –ро пирӯз кунанд ва аз идомаи ин вазъияти фоҷеабор пешгирӣ намоянд, дар ғайри он, ояндаи бисёр торик интизори мардуми минтақа хоҳад буд.

Dialog.tj