Маркази матбуоти Агентии назорати давлатии молиявӣ ва мубориза бо коррупсия аз боздошти афсаре хабар медиҳад, ки бо ваъдаи аз хизмати ҳарбӣ озод намудан 61 ҳазор сомонӣ талаб кардааст.

Манбаъ меафзояд, ки тафтиши пешакии парвандаи ҷиноятӣ нисбати Қудбиддинзода Қ.Қ. нишон дод, ки номбурда дар вазифаи афсари зершуъбаи ташкили системаи идоракунии шуъбаи нуқтаи идоракунии Раёсати амалиётии ситоди генералии Қувваҳои Мусаллаҳи Ҷумҳурии Тоҷикистон кор карда, моҳи ноябри соли 2023 бо истифода аз мақоми хизматии худ бо роҳи фиреб ба боварии шаҳрванд О.Т. даромада, аз номбурда барои аз хизмат дар сафи Қувваҳои Мусаллаҳ озод намудани хешовандаш О.Н.И. маблағи 61000 сомонӣ талаб намудааст.

Гуфта мешавад, ки Қудбиддинзода Қ.Қ. давоми соли 2024 дар якчанд маврид бо роҳи фиреб аз шаҳрванд О.Т. дар умум маблағи 59 ҳазор сомонӣ гирифта, онро ба эҳтиёҷоти шахсиаш сарф намуда, ба манфиати сарбоз О.Н.И. ягон амали муайянро иҷро накардааст.

Нисбати Қудбиддинзода Қ.Қ. бо моддаи 247 қисми 3 банди «а» КҶ парвандаи ҷиноятӣ оғоз шуда, он бо тасдиқи фикри айбдорӣ барои моҳиятан баррасӣ намудан ба суд ирсол гардидааст.

Dialog.tj