Даври чоруми музокироти атомии Эрон ва Амрико рӯзи якшанбе, 11-уми май дар пойтахти Умон – шаҳри Масқат баргузор шуд. Аббос Ироқчӣ, вазири корҳои хориҷии Ҷумҳурии Исломии Эрон ва роҳбари ҳайати эронӣ бо Стив Уиткофф, намояндаи хоси Трамп ва роҳбари ҳайати амрикоӣ беш аз се соат дар хусуси ҷузъиёти Барномаи ҳастаии Эрон гуфтугӯ намуданд.

Аббос Ироқчӣ пас аз анҷоми музокирот гуфт, ки даври чоруми музокироти Эрон ва Амрико дар хусуси Барномаи атомии Эрон хеле душвор буд, аммо мавқеи тарафҳо ба ҳам наздик шудаанд.

Тибқи иттилои расонаҳо даври чоруми музокироти атомии Эрон ва Амрико назар ба се даври аввал ҷиддӣ ва душвор ба назар мерасад, зеро дар ин давр дар хусуси ҷузъиёт, бахусус ҷузъиёти техникӣ ҷонибҳо музокира кардаанд.

Аббос Ироқчӣ дар шарҳи ҷузъиёти музокироти рӯзи якшанбе гуфт, ки “аз фазосозии куллӣ фосила гирифтем, вориди мавридҳои ҷузъитар шудем ва бо ин далел музокирот душвортар шудааст”.

Вазири корҳои хориҷии Ҷумҳурии Исломии Эрон гуфт, ки дар ҷараёни музокирот бо вуҷуди баҳсҳои душвор ва ҷиддӣ гуфтугӯи мусбат сурат гирифт ва афзуд, ки ду ҷониб дарки беҳтар аз мавқеи ҳам доранд. Ӯ таъкид кард, ки дар хусуси мавзуъҳои аслии мавриди ихтилоф бештар баҳс шуд ва мавқеъҳо ба ҳам наздиктар шудааст.

Аббос Ироқчӣ дар хусуси изҳороти ахири мақомоти амрикоӣ дар хусуси барчидани комили ғанисозии уран ва чархаи сӯхти атомӣ гуфт, ки чунин изҳорот бо раванди гуфтугӯ мутаззод аст ва ба он кумак намекунад. Ӯ таъкид кард, ки ин усул бояд тағйир кунад, агар тағйир накунад, Эрон ночор аст, бо ҳамин равиш вокуниш нишон диҳад.

“Ба назари мо ғанисозии уран ҳеч гоҳ мавзуи созиш нест. Шояд барои эътимодсозӣ, мисли гузашта маҳдудиятҳое дар андоза ва сатҳи ғанисозӣ гузошта шавад, аммо худи принсипи ғанисозӣ қобили музокира нест”- афзуд Аббос Ироқчӣ

Стив Уиткофф қабл аз оғози музокироти атомӣ ба Эрон гуфта буд, ки Эрон ҳаққи ғанисозии уранро надорад ва муассисаҳои ғанисозии уран бояд барчида шавад.

Аббос Ироқчӣ дар посух ба изҳороти Стив Уиткофф гуфт, ки ғанисозӣ дастоварди миллати Эрон аст ва хати сурхи ин кишвар дар музокирот бо Амрико хоҳад буд.

Расонаҳои амрикоӣ навиштанд, ки Стив Уиткофф дар даври чоруми музокирот бо Аббос Ироқчӣ гуфтугӯи мустақим ва ғайримустақим доштааст. Мақомоти амрикоӣ ҳозир дар музокира гуфтаанд: “Тафоҳум шуд, ки музокирот идома пайдо кунад ва рӯи бахшҳои техникӣ кор шавад, аммо аз натиҷаи имрӯз хурсандем ва мунтазири нишасти баъдӣ ҳастем, ки ба зудӣ баргузор хоҳад шуд”.

Дар ҳамин ҳол, вазири корҳои хориҷии Умон Бакр ал-Бусаидӣ музокироти миёни Эрон ва Амрикоро умедворкунанда хонд ва афзуд, ки ҳайатҳои ду ҷониб баъди гуфтугӯ бо роҳбарони кишварҳояшон замони баргузории даври панҷуми музокиротро эълон хоҳанд кард.

Тибқи иттилоъ, ду ҷониб барои идомаи музокирот ва доир намудани даври панҷуми он ба созиш расидаанд.

Dialog.tj