Шоми гузашта маълум шуд, ки дар марҳилаи ниҳоии Лигаи Чемпионҳои УЕФА бошгоҳҳои “ПСЖ”-и Фаронса ва “Интер”-и Италия бо ҳам рақобат мекунанд.

Дар мавриди ғолибияти финалистони имсолаи Лигаи Чемпионҳо назарҳо гуногунанд ва фикри ғолиб он аст, ки шонси ин бошгоҳҳо барои ба даст овардани муътабартарин мусобиқаи Аврупо баробар аст.

Аслан, бисёре аз коршиносон ба боваре буданд, ки дар марҳилаи нимниҳоӣ, ки дастаҳои “Барселона”-“Интер” ва “Арсенал”-“ПСЖ” вориди рақобат шуданд, бошгоҳҳои “Барселона” ва “Арсенал” ба даври ниҳоӣ мегузаранд ва он ҷо шонси “Барселона” зиёдтар аст, вале ҳама чиз баръакс шуд.

Бозиҳои марҳилаи нимниҳоӣ хеле ҷолиб шуданд. “ПСЖ” бо ҳисоби умумии 3 бар 1 “Арсенал”-ро шикаст доду ду бозии “Интер” ва “Барселона” бо ҳисоби умумии 7:6 ба фоидаи дастаи итолявӣ ба анҷом расид.

Гуфтан мумкин аст, ки ду дастаи пурқуввати дигар “Ливерпул” ва “Реал Мадрид”, ки бархеҳо бовар доштанд, имсол ғолиби мусобиқаи мазкур мешаванд, яке дар даври 1/8 ниҳоӣ ва дигаре дар марҳилаи 1/4 ниҳоӣ аз идомаи рақобат маҳрум гаштанд.

Ёдовар мешавем, ки бозии даври ниҳоии Лигаи Чемпионҳои УЕФА шоми 31-уми май баргузор мегардад.

Dialog.tj