Муҳаммадризо Ориф, муовини президенти Ҷумҳурии Исломии Эрон Масъуд Пизишкиён дар суҳбат бо Далер Ҷумъа, вазири энергетика ва захираҳои оби Ҷумҳурии Тоҷикистон гуфт, ки “Эрон хонаи дуюми шумо ва Тоҷикистон хонаи дувуми мо аст”.

“Мо ду кишвари ҳамсоя ва бародар ҳастем. Эрон хонаи дуюми шумо ва Тоҷикистон хонаи дуюми мост”- гуфт Муҳаммадризо Ориф.

Дар поёни 17-умин нишасти комиссияи муштараки ҳамкориҳои Эрон ва Тоҷикистон Муҳаммадризо Ориф ва Далер Ҷумъа дар ҷараёни мулоқоти дуҷониба масъалаҳои муҳимро баррасӣ намуданд. Муҳаммадризо Ориф баъди шунидани гузориши муфассали Вазири энергетика ва захираҳои оби Ҷумҳурии Тоҷикистон гуфт: “Барои густариши робитаҳои ду кишвар ҳеч монеае вуҷуд надорад ва ин сиёсати стратегӣ қабл аз ҳама ба муштаракоти фарҳангӣ, тамаддунӣ ва забонӣ бармегардад. Хушбахтона, бо иродаи сиёсии мавҷуда дар миёни мақомҳои ҳар ду кишвар метавонем робитаҳоро дар бахшҳои мухталиф густариш диҳем”.

Муҳаммадризо Ориф афзуд, ки иқтисоди ду кишвар метавонад ҳамдигарро такмил диҳад. Ҳамчунин, ӯ бо арзёбии мусбати баргузории мунтазами ҷаласаҳои Комиссияи муштарак ба иҷрои созишномаҳои бадастомадаи миёни ду кишвар таъкид намуд.

Муовини аввали президенти Эрон бо ишора ба зарфиятҳои вуҷуддоштаи ду кишвар дар бахшҳои мухталиф, аз ҷумла иқтисодӣ, фарҳангӣ, тиҷоратӣ, саноатӣ, хизматрасониҳои техникӣ, илмӣ ва омӯзишӣ чунин таъкид намуд: “Тақвияти иртибототи бахши хусусии ду кишвар аз аҳамияти хос бархӯрдор аст”.

Далер Ҷумъа дар ин мулоқот бо сипосгузорӣ аз меҳмоннавозии мардуми Эрон мақоми махсуси Ҷумҳурии Исломӣ дар сиёсати хориҷии Тоҷикистонро таъкид кард. Ӯ аз афзоиши мубодилоти тиҷоратӣ миёни ду кишвар хабар дода, гуфт, ки дар ҷаласаи комиссияи муштарак созиши хубе ҳосил шуд.

Dialog.tj