Рӯзи ҷавонон, ки ҳар сол рӯзи 23-уми май доир мешавад, имсол дар сатҳи баланди ташкилӣ ва фарҳангӣ баргузор хоҳад шуд. Дар ин хусус шуъбаи иттилооти дафтари раиси шаҳри Душанбе хабар додааст.

Тибқи иттилоъ, бар асоси қарори раиси шаҳри Душанбе Рустами Эмомалӣ нақшачорабиниҳои ҷашнӣ таҳия ва тасдиқ шудааст. Ҳадафи қарори мазкур амалӣ намудани сиёсати давлатии ҷавонон ва тарбияи руҳияи ватандӯстӣ дар онҳо мебошад.

Бар асоси супориши шаҳрдорӣ дар доираи ҷашни Рӯзи ҷавонон дар кӯча, хиёбон ва майдонҳои марказии шаҳр лавҳаҳо ва шиорҳои ҷашнӣ насб мешаванд. Яке аз чорабиниҳои муҳим дар ин рӯз - мулоқот бо гирандагони стипендияҳо, дорандагони мукофотҳои раисони ноҳияҳо бо раиси шаҳри Душанбе ва ҳамчунин, гирандагони стипендияи президенти Ҷумҳурии Тоҷикистон хоҳад буд ва ин мулоқот таҳти шиори “Мо пайравони Пешвои миллатем” баргузор мегардад.

Ҳамчунин, дар давоми як моҳ бо ширкати ҳунармандони машҳури ҷумҳурӣ таҳти шиори “Зинда бод ҷавонӣ ва ҷавонон” дар муассисаҳои фарҳангӣ ва боғҳои шаҳри Душанбе барномаҳои консертӣ баргузор мешавад. Мусобиқаҳои варзишӣ ва озмунҳои эҷодӣ низ дар назар гирифта шудааст.

Ёдовар мешавем, ки Рӯзи ҷавонон ба муносибати мулоқоти аввалини президенти кишвар Эмомалӣ Раҳмон бо ҷавонон, ки дар таърихи 23-уми майи соли 1997 доир шуда буд, ҳамасола ҷашн гирифта мешавад. Дар он сол фармони президенти кишвар бо номи “Дар бораи баъзе масъалаҳои беҳтар кардани кор бо ҷавонон” ба имзо расида буд.

Ҳамасола президенти кишвар Эмомалӣ Раҳамон ба муносибати 23-уми май, Рӯзи ҷавонон, бо ҷавонони фаъоли кишвар мулоқот анҷом медиҳанд.

Dialog.tj