Бонки рушди Осиё мақсад дорад то соли 2030 ҳаҷми кумак ба амнияти озуқаворӣ дар кишварҳои Осиё ва Уқёунуси Ором ба 40 миллиард доллар расонад. Дар ин хусус президенти Бонк Масато Канда рӯзи 4-уми парел дар нишасти солонаи Бонк иттилоъ дод.

Ӯ гуфт, ки 26 миллиард доллар ба маблағи 14 миллиард доллари қаблан ваъдашуда илова хоҳад шуд, ки аз он 11 миллиард аллакай ҷудо шудааст. Аз маблағи нави эълоншуда 18,5 миллиард доллар ба кумаки давлатӣ ва 7, 5 миллиард ба сармоягузорӣ ба бахши хусусӣ ихтисос дода мешавад.

Қаблан, Ӯзбекистон аз Бонки рушди Осиё қарзи 150 миллиард ва гранти 3 миллион доллар барои беҳсозии амнияти озуқаворӣ ва об дастрас карда буд.

Масато Канда зикр кард, ки хушксолиҳои бесобиқа, селҳо, гармии шадид ва коҳиши захираҳои табиӣ ба истеҳсоли кишоварзӣ таъсири ҷиддӣ расонда, амнияти озуқаворӣ ва зиндагии деҳқононро таҳдид мекунад. 

Маблағи Бонки рушди Осиё ба таҳдиди занҷираи пурраи таъминоти озуқаворӣ, аз истеҳсол ва коркард то тақсим ва истеъмол равона мешавад. Ин кумак ҳам ба лоиҳаҳои давлатӣ ва ҳам ба бахши хусусӣ равона хоҳад шуд. То соли 2030 саҳми бахши хусусӣ дар ин барнома бояд ба 27 дарсад расад.

Масато Канда, президенти Бонк афзуд, ки дар шароити болоравии нархҳо ва таваррум арзиши маҳсулоти хӯрокворӣ ба яке аз мушкилоти асосӣ мубаддал шудааст: “Мардум маҷбур мешаванд, интихоб кунанд: хӯрок барои оила ё роҳкиро барои расидан ба ҷойи кор”.

Роҳбари Бонки рушди Осиё гуфт, ки дар кишварҳои рӯ ба тараққии Осиё беш аз нисфи мардумон аз гуруснагӣ ранҷ мебаранд. Зиёда аз 70 фоиз захираҳои обии ҷаҳон дар бахши озуқаворӣ истифода мешаванд, 50 фоиз заминҳои қобили зист ва 80 фоиз талафоти гуногунрангии биологӣ низ ба ҳамин соҳа рост меоянд. Дар бахши кишоварзии минтақа тақрибан 40 фоиз аҳолии фаъол ба кор машғул мебошанд.

“Мо бояд тарзи истеҳсоли хӯрокро тағйир диҳем, то саломатии сайёраро нигоҳ дорем”- таъкид кард Масато Канда.

Ба рақамисозӣ, беҳ сохтани қабули қарорҳо дар бахши кишоварзӣ, таҷдиди занҷираи арзиши маҳсулоти агроозуқаворӣ ва дастрасии аҳолии осебпазир ба хурока таваҷҷуҳи махсус дода мешавад. Ҳамчунин, ба барқарорсозии хок ва гуногунрангии биологӣ сармоягузорӣ хоҳад шуд.

Бонки рушди Осиё дар ҳамоҳангӣ бо Глобал - фонди муҳити зист, фонди сармояи табииро бо ҳаҷми 150 миллион доллар таъсис медиҳад. Ин механизми нави сармоягузории омехта ташаббусҳои деҳқонон ва навоваронро дар идоракунии устувори захираҳои табиӣ дастгирӣ хоҳад кард.

Бонки рушди Осиё соли 1966 таъсис ёфта, 69 кишвар, аз ҷумла Тоҷикистонро муттаҳид мекунад. Бонки мазкур воситаҳои молиявӣ ва стратегӣ, рушди устувор ва фарогирро дар минтақа дастгирӣ мекунад.

Dialog.tj