Бинобар иттилои Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон рӯзҳои 6-ум ва 7-уми майи соли равон омадани сел ва аз 8-ум то 10-уми май тӯфони чангу ғубори шиддатнок пешгӯӣ мешавад.

Манбаъ меафзояд, ки рӯзҳои 6-ум ва 7-уми майи соли равон бо сабаби баландшавии ҳарорати ҳаво дар баъзе минтақаҳои вилоятҳои Суғду Хатлон, ноҳияҳои тобеъи ҷумҳурӣ ва ғарби Вилояти Мухтори Кӯҳистони Бадахшон сар задани селҳои хусусияти маҳаллидошта аз эҳтимол дур нест.

Ҳамчунин, ин ниҳод маълумот медиҳад, ки аз 8-ум то 10-уми майи соли ҷорӣ дар қаламрави Ҷумҳурии Тоҷикистон тӯфони чангу ғубори шиддатнок пешгӯӣ мешавад, ки аз шиддатнокии вазиши шамол бо суръати то 15-20м/с дар ноҳияҳои ҷанубӣ ва шимолии ҷумҳурӣ ба вуҷуд меояд.

Бинобар ин, тавсия дода мешавад, ки дар рӯзҳои гуфташуда кӯдакон ва наврасон, пиронсолон, занони ҳомила, одамони гирифтори бемориҳои системаи нафаскашӣ (астма, бронхит, бемориҳои музмини шуш), одамони гирифтори бемориҳои дилу раг, шахсони масуният (иммунитет)-и сустдошта бе зарурат аз хона набароед.

Dialog.tj