Саммити Осиёи Марказӣ – Шурои ҳамкории кишварҳои арабии Халиҷи Форс, ки қарор буд 5-уми май дар шаҳри Самарқанд баргузор гардад, ба муҳлати номаълум ба таъхир гузошта шуд.

“Ҷонибҳо корҳои муштаракро дар хусуси мушаххас намудани санаи нави баргузории Саммит дар асоси машваратҳои дуҷониба идома медиҳанд. Дар бораи сана ва ҷузъиёти дигари Саммит баъдан хабар дода мешавад” – зикр мекунад  Вазорати корҳои хориҷии Ӯзбекистон.

Вазорати корҳои хориҷии Ӯзбекистон таъкид кардааст, ки корҳо дар хусуси таҳкими гуфтугӯ ва ҳамгироиву шарикӣ дар доираи формати мазкур идома меёбад.

Қобили зикр аст, ки нахустин Саммити Осиёи Марказӣ – Шурои ҳамкориҳои кишварҳои арабии Халиҷи Форс моҳи июли соли 2023 дар шаҳри Ҷиддаи Арабистони Саудӣ доир шуда буд.

Ба ҳайати ин Шуро шаш кишвари арабӣ шомиланд, аз ҷумла Арабистони Саудӣ, Аморати Муттаҳидаи Араб, Кувайт, Баҳрайн, Уммон ва Қатар.

Қаблан гузориш шуда буд, ки коршиносон аз кишварҳои Осиёи Марказӣ ва Халиҷи Форс дар як форум дар Тошканд мулоқот анҷом доданд.

Dialog.tj