Ҳукумати Қазоқистон қоидаҳои нави гирифтани низоми раводидро барои сармоягузорон ҷорӣ кард, ки ҳадафаш осон намудани раванди кори онҳо хоҳад буд.

Бар асоси ташаббуси Вазорати корҳои хориҷии Ҷумҳурии Қазоқистон қоидаҳои нави гирифтани раводиди сармоягузорӣ тасдиқ шуданд, ки ҳадафи  он таҳкими ҷаззобияти сармоягузорӣ дар Қазоқистон ва дастгирии ҳамкориҳои дарозмуддати тиҷоратӣ мебошад.

Тибқи қоидаи нав шаҳрвандони хориҷие, ки на камтар аз 300 000 доллари Иёлоти Муттаҳидаи Амрико ба сармояи оинномавии ширкатҳои қазоқӣ ё коғазҳои қиматноки маҳаллии дорои эмиссия сармоягузорӣ кардаанд, метавонанд дархости электрониро барои гирифтани раводиди сармоягузорӣ пешниҳод кунанд.

Таъкид мешавад, ки ин “раводиди тилоӣ” имкони гирифтани иҷозатномаи ҷойи зист дар Қазоқистонро ба муҳлати 10 сол пешинӣ мекунад.

Тибқи иттилои Вазорати корҳои хориҷии Ҷумҳурии Қазоқистон чунин барномаҳои раводид, ки дар таҷрибаи байналмилалӣ васеъ истифода мешаванд, ҳамчун воситаи муассири ҷалби сармоя, технология ва фаъолиятҳои тиҷоратӣ шинохта шудаанд. Қазоқистон низ ба ин равиш ворид  шуда, модели худро пешниҳод кардааст.

Додани “раводиди тилоӣ” муҳити мусоид ва пешгӯишавандаро барои сармоягузорони хориҷӣ фароҳам мекунад, кафолатҳои ҳуқуқӣ муҳайё мекунад ва ба эътимоди бештар нисбат ба муҳити сармоягузории Қазоқистон мусоидат менамояд. Ин навовариҳо равияи стратегии кишварро ба сӯйи озод будан, ҳифзи сармоя ва густариши робитаҳои устувори иқтисодии байналмилалӣ инъикос мекунад, таъкид кардааст ВКХ –и Қазоқистон.

Раводиди тилоӣ баъди 10 рӯзи нашршуданаш қувваи қонунӣ гирифта, мавриди амал қарор мегирад. Қаблан хабар дода буданд, ки чанд нафар шаҳрвандони хориҷӣ “раводиди тилоӣ” –и Қазоқистонро ба даст оварда буданд.

Dialog.tj