Полиси Душанбе дар доираи чорабиниҳои ҳадафманди пешгирикунанда ду соҳибкорро барои фурӯши тамокӯ (сегарет) ба ноболиғон боздошт карданд.

Тибқи иттилои Раёсати Вазорати корҳои дохилии Ҷумҳурии Тоҷикистон дар шаҳри Душанбе дар ҷараёни гузаронидани рейд маълум гардид, ки маҳсулоти тамокӯ ба шахсони то 18-сола фурӯхта шудааст.

Бар асоси иттилоъ, қонуншикании қоидаҳои фурӯши сигарет аз ҷониби ду соҳибкор - Исломиддин Салиев, сокини 45 – солаи шаҳри Душанбе ва Маҳмадалӣ Пиров, сокини 34-солаи  ноҳияи Балҷувон сурат гирифтааст.

Дар натиҷаи тафтишот мушаххас шуд, ки ин ду соҳибкор бо мақсади ба даст овардани фоидаи моддӣ, бе огоҳӣ ба як наврас сигарет фурӯхтаанд.

Нисбати афроди боздоштшуда парванда боз шуда, тафтишот идома дорад.

Дар Тоҷикистон фурӯхтани тамокӯ ва маҳсулоти спиртӣ ба ноболиғон манъ буда, дар қонун ҷавобгарии ҷиноӣ пешбинӣ шудааст.

Dialog.tj