Мақомоти Созмони Милали Муттаҳид мегӯянд, ки Исроил чун як кишвари ишғолгар ба ҳеч як аз қонунҳои байналмилалӣ пойбанд нест ва ҳадафаш нобудии комили аҳолии Навори Ғазза аст.

Намояндагони Созмони Милали Муттаҳид таъкид намуданд, ки Ғазза дар вазъияти фоҷеабори башарӣ қарор дорад. Захираҳои маводи ғизоӣ тамом шуда, аксари мардум ҳатто оби нӯшокӣ надоранд.

Аҷит Сонгай, раиси Дафтари Комиссари олии ҳуқуқи башари Созмони Милали Муттаҳид мегӯяд “ҳодисаҳое, ки дар Навори Ғазза рӯй медиҳанд, ба сатҳи бесобиқаи буҳрони башардӯстона расидааст ва Исроил ба уҳдадориҳои ҳуқуқии худ амал намекунад”.

Вай дар суҳбат бо телевизиони “Ал-Ҷазира” гуфт, ки вазъият дар Навори Ғазза дар 18 моҳи гузашта бадтар шуда, ба гурезаҳо об ва нон тақсим намешавад. Ӯ афзуд, ки Барномаи ҷаҳонии озуқа чанд рӯз қабл эълон кард, ки захираҳои ғизоӣ дар Ғазза тамом шудааст ва дигар чизе барои тақсим намудан дар миёни фаластиниён боқӣ намондааст.

Ин мақоми Созмони Милали Муттаҳид бо изҳори нигаронӣ гуфт, ки дар 60 рӯзи гузашта ҳатто як халта орд вориди Навори Ғазза нашудааст ва мардуми ин минтақа ба кумакҳои фаврии башардӯстона ниёз доранд. Бар асоси иттилоъ, ҳудуди 2 миллиону 200 ҳазор нафар борҳо маҷбур ба тарки маҳалли худ шудаанд.

“Идомаи чунин вазъ дар Ғазза натиҷаи фишори нокофии ҷомеаи ҷаҳонӣ ба Исроил аст. Ин режим ба ҳеч як аз қонунҳои байналмилалӣ арҷ намегузорад ва бо созмонҳои башардӯстона ҳамкорӣ намекунад” – таъкид намуд намояндаи СММ.

Дар ҳамин ҳол Дафтари ҳамоҳангсози умури башардӯстонаи Созмони Милали Муттаҳид низ гуфт, ки камбуди шадиди Ғизо ҳамаи минтақаи Навори Ғаззаро фаро гирифтааст ва шумори кӯдакони гирифтори камғизоӣ дар муқоиса бо моҳи март 80 дарсад афзӯдааст.

Бунёди кӯдакони Созмони Милали Муттаҳид - ЮНИСЕФ ҳушдор дод, ки 335 ҳазор кӯдаки то 5 сола дар Навори Ғазза бо хатари ҷиддии марг бо сабаби нарасидани ғизо рӯ ба рӯ мебошанд.

Тибқи гузориши Созмони Милали Муттаҳид 92 дарсади кӯдакони аз 2 то 6 сола дар Ғазза бо сабаби он ки модаронашон ғизои кофӣ дарёфт намекунанд, ба хатари ҷиддӣ рӯ ба рӯ мебошанд. Созмони Милали Муттаҳид мегӯяд, ки агар кӯдакон аз камғизоӣ наҷот наёбанд, дар оянда бо бемориҳои ҷиддие чун норасоии масъунияти бадан рӯ ба рӯ хоҳанд шуд. То рӯзи ҷумъаи ҳафтаи гузашта беш аз 50 кӯдак бар асари гуруснагӣ ҷони худро аз даст додаанд.

Масъулони Созмони ҷаҳонии кумакрасонӣ гуфтаанд, ки 65 фоизи аҳолии Навори Ғазза ба камбуди оби нӯшокӣ ва пӯхтупаз дастрасӣ надоранд.

Доктор Мунир ал-Барш, мудири кулли Вазорати тандурустии Ғазза гуфт, ки баста мондани гузаргоҳҳо боиси вазъи бади башардӯстона, бахусус дар бемористонҳо шудааст.

“Мо ба як буҳрони бузурги инсонӣ дар Ғазза рӯ ба рӯ ҳастем ва бузургтарин қурбониён кӯдакон ва занони ҳомила мебошанд”- гуфт Мунир ал-Барш.

Мунир ал-Барш гуфт, ки ҳадафи Исроил нобуд кардани насли фаластиниҳо аст ва бо ин мақсад, пеши роҳи расидани об ва ғизо ба мардуми Фаластинро гирифтааст. Ба гуфтаи ӯ, беш аз 40  ҳазор кӯдак дар Навори Ғазза ятим шудаанд ва 100 кӯдак дар ҳоле, ки интизори боз шудани гузаргоҳҳо буданд, ҷон бохтанд. Наздик ба 1 миллион кӯдак дар Ғазза аз кумакҳои ҳаётан муҳим маҳрум мебошанд.

Dialog.tj