Дар мулоқоти Вазири саноат ва технологияҳои нави Ҷумҳурии Тоҷикистон бо раиси вилояти Форси Ҷумҳурии Исломии Эрон Ҳусайналӣ Амиралӣ масъалаи ба роҳ мондани хатсайри “Наврӯз эрлайн” матраҳ шуд.

Ҳусайналӣ Амирӣ, раиси вилояти Форси Эрон дар суҳбат бо Шералӣ Кабир ва сафири Тоҷикистон пешниҳод кард, ки миёни кишварҳои ҳавзаи Наврӯз барои осон кардани сафари шаҳрвандон хатсайри ҳавоии “Наврӯз эрлайн”  роҳандозӣ шавад.

Шералӣ Кабир аз пешниҳоди мақоми эронӣ истиқбол карда гуфт, ки ташкили парвози мустақим миёни Шероз ва Душанбе рӯйдоди муҳим дар раванди густариши ҳамкориҳо аст. Ӯ афзуд, ки ифтитоҳи консулгарии Тоҷикистон дар Шероз барои осон шудани сафари сайёҳон ва тақвияти робитаҳои дуҷониба иқдоми муассир мебошад.

Ҳусайналӣ Амирӣ, ки дар ҳошияи Намоишгоҳи “Эрон Экспо-2025” бо Шералӣ Кабир мулоқот намуд, афзуд, ки бо таваҷҷуҳ ба дастури роҳбари олии Эрон “дар мавриди густариши робита бо кишварҳои минтақа ва дастури президент сиёсати давлати чордаҳум ба таҳкими робитаҳо бо ҳамсоягон асос ёфтааст ва роҳбарияти олии вилояти Форс дар доираи салоҳияте, ки аз давлат гирифтааст, дар ин замина қатъӣ амал хоҳад кард”.

Масъули эронӣ дар ин мулоқот ба ҳамзабонӣ ва муштаракоти таърихӣ ва фарҳангии Тоҷикистону Эрон ишора карда, афзуд, ки Наврӯз як падидаи барҷастаи фарҳангӣ ва умумӣ миёни ду кишвар аст. Раиси вилояти Форси Эрон бо шумурдани зарфиятҳои фарҳангӣ ва таърихии вилояти Форс ба густариш додани робитаҳои Эрон ва Тоҷикистон дар бахши сайёҳӣ таъкид кард.

Dialog.tj