Вазири амнияти Покистон Атоуллоҳ Тарор мегӯяд бар асоси иттилооти ҷосусӣ Ҳиндустон эҳтимолан аз 24 то 36 соати оянда ба Покистон ҳамлаи низомӣ анҷом диҳад.

Вазири амнияти Покистон рӯзи сешанбе, 30-уми апрел дар як паёми наворӣ гуфт, ки Ҳиндустон мехоҳад дар пайи ҳамлаи террористии ахир дар минтақаи Паҳалгами Кашмир, аз ҳамлаи низомӣ дар муқобили Покистон истифода кунад.

Ӯ гуфт, ки “ҳар гуна таҷовуз аз ҷониби Ҳинд бо вокуниши қотеъ ва шадиди Покистон рӯ ба рӯ хоҳад шуд” ва ҳушдор дод, ки “масъулияти ҳар гуна низоъ ё паёмадҳои фоҷеабори минтақа ба таври комил бар уҳдаи Ҳиндустон хоҳад буд”.

Дар ҳамлаи террористие, ки ба наздикӣ дар минтақаи Паҳалгам рӯй дод, 26 нафар сайёҳ кушта шуд. Ҳиндустон гурӯҳҳои ниманизомии муҳимми Покистонро масъули ҳамла дониста, иддаои мақомоти ин кишвар дар робита ба даст надоштанашонро рад кардааст.

Атоуллоҳ Тарор гуфт, неруҳои мусаллаҳи Покистон дар ҳолати омодабоши комил қарор доранд ва афзуд, ки дар сурати ба вуҷуд омадани даргирӣ ҳамаи масъулият ба дӯши Ҳиндустон хоҳад буд.

Бархе коршиносон гуфтаанд, ки бо наздик шудани интихобот дар Ҳиндустон фазои низоъ метавонад барои ҷалби таваҷҷуҳи фазои дохилии ин кишвар истифода шавад.

Баъди ҳамлаи террористӣ дар минтақаи Кашмири таҳти назорати Ҳиндустон муносибатҳои дипломатӣ миёни Ҳиндустон ва Покистон қатъ шуд. Мақомоти Ҳиндустон Покистонро дар созмондиҳии ҳамлаи террористӣ муттаҳам намуданд. Ҳукумати Покистон гуфт, ки бо террористон дар ҳар куҷое набошанд, бархӯрди шадид сурат хоҳад гирифт.

Dialog.tj