Вазири дифои Ҷумҳурии Исломии Покистон Хоҷа Осиф дар суҳбат бо телевизиони “Скай Нюз” иқрор намуд, ки ҳукуматҳои гузашта дар ин кишвар дар се даҳсолаи ахир аз гурӯҳҳои террористӣ ба хотири манфиатҳои Амрико ва Британияи Кабир пуштибонӣ кардаанд.

“Мо се даҳсола аст, ки ин корҳои нопокро барои Амрико ва Аврупо, аз ҷумла Британия анҷом медиҳем. Ин иштибоҳе буд, ки мо содир кардем ва ба ҳамин хотир имрӯз чунин масъалаҳо ба сари мо омадааст”- гуфт вазири дифои Покистон.

Хоҷа Осиф зикр кард, ки агар Покистон дар ҷанги зидди Шӯравӣ дар солҳои 1980 ва баъдан дар ҷанги ба истилоҳ “Мубориза бо терроризм” баъд аз ҳамлаҳои 11-уми сентябр ширкат намекард, “собиқаи ин кишвар поку беайб мемонд”.

Вазири дифои Покистон бо таъкид ба паёмадҳои дохилии сиёсати пуштибонӣ аз терроризм гуфт: “Мо нархи гарон пардохтем. Ҷомеаи мо осеб дид ва амнияти мо халалдор шуд”.

Ин изҳорот баъд аз чанд рӯзи ҳамлаи террористӣ дар минтақаи Паҳалгам дар Кашмири зери назорати Ҳиндустон садо дод. Ин ҳодиса боиси сардӣ ва танишҳои бесобиқа миёни Покистон ва Ҳиндустон шуд.

Дар пайи ин ҳамла Ҳиндустон шартномаи оби Синдро бекор кард, марзи Аттариро баст ва дипломатҳои Покистонро депорт намуд. Ҳамчунин, Деҳлӣвизаҳои ба шаҳрвандони Покистон додаашро бекор кард ва аз онҳо хост, ки қаламрави Ҳиндустонро тарк кунанд.

Дар посух Покистон низ гузаргоҳи Вагҳаро баст ва фазои ҳавоии худро ба рӯи парвозҳои Ҳинд баст. Покистон ҳамчунин, шумораи зиёди дипломатҳои Ҳиндро ихроҷ намуд ва вазифаҳои додашуда ба шаҳрвандони Ҳиндро бекор кард.

Дар ҳамлаи террористии гурӯҳҳои мусаллаҳ дар Кашмир беш аз 26 сайёҳ кушта шуданд.

Ҷумҳурии Исломии Покистон дирӯз эълон кард, ки Ҳиндустон бо иқдомҳои душманонааш Покистонро ба даст доштан ба ин ҳодисаи террористӣ муттаҳам мекунад.

Гурӯҳи террористии Толибон аз ҷумлаи гурӯҳҳои мусаллаҳи террористие буданд, ки дар се даҳаи ахир дар Покистон пинҳон нигоҳ дошта мешуданд ва бар зидди ҳукумати қонунии вақти Афғонистон ҳамлаҳои террористӣ анҷом медоданд.

Кишварҳо Покистонро муттаҳам мекунанд, ки дар чанд даҳа ба гурӯҳҳои ифротӣ паноҳ додааст. Онҳо дар Покистон омӯзиши низомӣ дида, дар Афғонистону Ҳиндустон ҳамлаҳо анҷом медиҳанд.

Мақомоти покистонӣ дар даст доштан ба ҳамла ба сайёҳон дар Кашмирро рад карда, Ҳиндро ба ҳимоят дар гурӯҳҳои мусаллаҳи зиддипокистонӣ муттаҳам кардаанд.

Дар ҳамин ҳол, Ҳинд Покистонро масъули ин ҳамла медонад ва дар посух робитаҳои дипломатии худ бо ин кишварро қатъ кардааст.

Dialog.tj