Ҳиндустон визаҳое, ки қаблан ба шаҳрвандони Покистон дода буд, бекор кард. Вазорати хориҷаи ин кишвар ба шаҳрвандони Ҳиндустон иттилоъ дод, ки аз Покистон ба кишвари худ баргарданд.

Кумитаи амнияти миллии Покистон ба чораҳои ҷавобии Ҳиндустон вокуниш нишон дод. Дар посух ба иқдомҳои Ҳиндустон Исломобод гузаргоҳи сарҳадии Вагаҳро мебандад - ягона нуқтаи аҳолинишин, ки дар он сарҳади байни Ҳиндустон ва Покистон убур карда мешавад ва инчунин, тамоми визаҳои додашуда ба шаҳрвандони Ҳиндустонро боз медорад.

Покистон ҳамчунин, фазои ҳавоии худро барои ҳамаи ширкатҳои ҳавоии Ҳиндустон баст. Шумораи дипломатҳои Ҳиндустонро дар Исломобод коҳиш дод ва тамоми тиҷорат бо ин кишварро боздошт.

Дар изҳороти мақомоти покистонӣ гуфта мешавад, ки нарасидани тафтишоти боэътимод ва далелҳои санҷидашаванда, кӯшишҳои Ҳиндустон барои рабт додани ҳамла дар Кашмир ба Покистон “бепарвоёна, беасос ва бе мантиқ аст”.

Ғайр аз ин, дар изҳороти Шурои амнияти миллии Покистон зикр шуд: “Мо ҳар гуна кӯшиши Ҳиндустон барои масдуд кардани ҷараёни об ба Покистонро, баъд аз хориҷ шуданаш аз Созишномаи оби Ҳинд ҳамчун амали ҷангӣ арзёбӣ хоҳем кард”.

Ёдовар мешавем, ки рӯзи 22-уми апрел шахсони мусаллаҳ ба як гурӯҳи сайёҳон дар қисми ҳиндустонии Кашмир оташ кушоданд. Мақомот аз ҳалокати 26 нафар ва ҷароҳат бардоштани 17 тани дигар хабар доданд.

Полиси Ҳиндустон шахсияти гумонбаронро дар ҳамлаи Кашмир муайян кардааст. Барои маълумот дар хусуси макони будубоши террористони фирорӣ 2 миллион рупия ҷоиза таъйин шудааст.

Dialog.tj