Мақомоти Ҷумҳурии Исломии Эрон мегӯянд, ки даври сеюми музокироти атомии Эрон ва Амрико дар Уммон дар муқоиса бо ду давраи қаблӣ душвортар хоҳад буд.

Ин изҳорот дар ҳолест, ки Вазири корҳои хориҷии Иёлоти Муттаҳидаи Амрико эълон кардааст, ки Эрон фақат бояд иҷозаи воридоти урани ғанишударо дошта бошад.

Алоуддин Буруҷардӣ, узи Кумитаи амният ва сиёсати хориҷии Маҷлиси Эрон ба хабаргузории «Исно» гуфт, ки марҳилаи осони музокирот дар давраҳои нахуст ва дувум гузаронида шудаанд, вале “вақте кор ба марҳилаи  коршиносӣ мерасад, музокирот ҷиддӣ ва душвор мегардад”.

Мақоми эронӣ гуфт, ки орзуи Ҷумҳурии Исломӣ расидан ба натиҷа дар музокирот аст, зеро “гузинаи дигар вуҷуд надорад”, аммо ҳамзамон ҳушдор дод, ки Эрон аз “ҳаққи қонунии атомии худ даст нахоҳад кашид”. Ӯ таъкид кард, ки Амрико барои рафъи нигарониҳо ва дарёфти замонат бояд таҳримҳоро ҳамчун гузашт бардорад.

Аббос Ироқчӣ, вазири корҳои хориҷии Ҷумҳурии Исломии Эрон дар суҳбат бо хабарнигори “Садо ва симои Эрон” гуфт: “Мо рӯзи шанбе бо ҷиддият вориди музокирот хоҳем шуд”.

Ӯ ба мавқеъгирии зиддунақизи Амрико, ки дар расонаҳо бозтоб меёбанд, ишора карда, гуфт: “Агар хостаи Амрико фақат пешгирии Эрон аз сохти силоҳи атомӣ бошад, агар талаботи ғайримантиқӣ ва амалинашаванда матраҳ шавад, бо мушкил рӯ ба рӯ хоҳем шуд”.

Аббос Ироқчӣ, ки барои мулоқот бо мақомоти Чин ба Пекин рафта буд, аз ҷараёни музокирот то ба имрӯз изҳори қаноатмандӣ карда буд.

Дар ҳамин ҳол, Марко Рубио, вазири корҳои хориҷии Амрико чанде қабл дар мусоҳиба бо барномаи подкастӣ гуфт, агар Эрон фаъолиятҳои атомии сулҳомез мехоҳад, бояд урани ғанишударо ворид намояд. Ӯ афзуд, ки агар Теҳрон бар идомаи ғанисозии уран дар дохили кишвар пофишорӣ кунад, “танҳо кишвари ҷаҳон хоҳад буд, ки барномаи силоҳи атомӣ надорад, аммо ғанисозии уранро мекунад ва ман фикр мекунам, ин масъалаеро эҷод намекунад”.

Дафтари Стив Уиткофф, намояндаи махсуси Доналд Трамп ва масъули музокироти атомӣ бо Ироқчӣ аз сӯйи Эрон, ҳафтаи гузашта эълон кард, ки Амрико хостори қатъи комили барномаи ғанисозии уран дар Эрон аст.

Мақомоти эронӣ борҳо таъкид кардаанд, ки ин мавзуъ қобили музокира нест ва “хати сурх” –и Ҷумҳурии Исломии Эрон ба шумор меравад.

Лоуренс Норман, хабарнигори “Вол стрит журнал” дар паёме дар шабакаи иҷтимоии “Х”, ки дар расонаҳои эронӣ низ васеъ бозтоб ёфтааст, аз пешниҳоди Эрон ба Амрико дар Рим барои сармоягузорӣ дар рушди саноати атомии Эрон хабар додааст.

Дар ҳамин ҳол, хабаргузории “Рейтерз” бо истинод ба Маркази илм ва амнияти ҷаҳонӣ бо такя ба тасвирҳои моҳвораӣ гузориш дод, ки Теҳрон тадбирҳои шадиди амниятии атрофи муассисаи атомии Натанзро таҳким бахшида, деворҳои муҳофизатӣ дар атрофи он бунёд кардааст.

Ин гузориш ба посухи масхараомези Вазири корҳои хориҷии Ҷумҳурии Исломии Эрон рӯ ба рӯ шудааст, ки дар паёме дар “Х” онро “ваҳшатангез” номида, навишт: “Талошҳои Исроил ва баъзе гурӯҳҳои манфиатдори махсус барои фосила андохтан дар дипломатия – бо истифода аз ҳар гуна тактикаҳо барои ҳама комилан ошкор аст”.

Рафаэл Гросси, директори генералии Оҷонсии байналмилалии неруи атомӣ, ки ба наздикӣ ба Теҳрон сафар карда буд, ҳангоми музокироти Эрон ва Амрико низ дар Рим ҳузур дошт, шоми чоршанбе эълон кард, ки бо мувофиқаи Эрон як гурӯҳи фаннӣ дар рӯзҳои наздик вориди кишвар хоҳад шуд, то дубора камераҳои назоратии оҷонсро дар муассисаҳои атомии Эрон насб кунад.

Dialog.tj