Музокироти техникӣ миёни Эрон ва Амрико, ки бояд рӯзи шанбеи ҳафтаи оянда баргузор шавад, ба шеваи ғайримустақим ва бо миёнаравии коршиносони Уммон дар шаҳри Масқат сурат мегирад. Дар ин хусус хабаргузории “Тасним” –и Эрон хабар додааст.

Тибқи иттилоъ, музокирот бо ҳузури коршиносони соҳаҳои атомӣ ва таҳримҳо аз ду кишвар баргузор шуда, мақсади он расидан ба як созиши муштарак аст. Ин музокирот дар ҳоле доир мегардад, ки намояндагони Вазорати корҳои хориҷӣ ва Вазорати молияи Иёлоти Муттаҳидаи Амрико низ дар ҳайати коршиносони амрикоӣ ба Масқат сафар мекунанд.

Қабл аз ин гузориш нашр шуд, ки рӯзи шанбе дар чорчӯби даври сеюми музокирот миёни Аббос Ироқчӣ, вазири корҳои хориҷии Эрон ва Стив Уиткофф, намояндаи хоси президенти Иёлоти Муттаҳидаи Амрико натиҷаҳои ҷаласаҳои коршиносӣ дар мавриди тағйири ин ҷаласа ба рӯзи дигар гузошта шуд.

Аббос Ироқчӣ баъди поён ёфтани давраи дувуми музокирот онро “созанда” ва “пешрафткунанда” арзёбӣ карда буд. Доналд Трамп, президенти Амрико низ аз раванди музокирот изҳори қаноатмандӣ намудааст.

Аббос Ироқчӣ айни замон бо як паёми президенти Эрон Масъуд Пизишкиён ба Пекин сафар кард ва рӯзи чоршанбе изҳор дошт, ки “Агар ҷониби амрикоӣ ба равиши созанда идома диҳад ва аз талаботи ғайривоқеӣ ва номумкин худдорӣ намояд, мутмаин ҳастам, ки метавон ба як тафоҳуми олӣ ноил шуд”.

Ӯ ҳамчунин, бар нақши калидии Чин дар раванди тафоҳум бо Иёлоти Муттаҳидаи Амрико ва густариши ҳамкориҳои тиҷоратӣ бо ин кишвар баъди лағви таҳримҳо таъкид намуда буд.

Dialog.tj