Дар миёни бархе шаҳрвандони кишварҳои фақир, ба мисли Сурия, Афғонистон, Ироқ, Лубнон шаҳрвандони Тоҷикистон ва Туркманистон низ дар қатори донорҳои зиндаи пайванди узвҳои бадан – ҷигар ва гурдаи бемористонҳои Эрон қарор гирифтаанд.

Мудири бахши пайванди аъзои бадани Донишгоҳи тиббии Машҳад доктор Иброҳим Холиқӣ дар суҳбат бо расонаҳо гуфт, ки 72 амалиёти пайванди гурдаву ҷигар аз ҷониби донорҳои зинда, дар соли гузашта, дар бемористон анҷом дода шуд. Ин омор дар муқоиса ба омори соли 2023 33 дарсад бештар аст.

Доктор Иброҳим Холиқӣ гуфт, ки дар соли гузашта 68 амалиёти пайванди гурда аз донорҳои зинда барои 26 бемори эронӣ ва 42 бемори ғайриэронӣ аз кишварҳои Ироқ, Афғонистон, Туркманистон, Тоҷикистон, Сурия ва Лубнон дар бемористони Мунтасиряи Машҳад сурат гирифт.

“Ин дар ҳолест, ки дар соли 2023 51 мавриди пайванди гурда аз донорҳои зинда барои 28 бемори эронӣ ва 23 бемори ғайриэронӣ аз кишварҳои Ироқ, Афғонистон, Тоҷикистон, Туркманистон ва Лубнон анҷом дода шуда буд” – гуфт Доктор Иброҳим Холиқӣ.

Иброҳим Холиқӣ афзуд, ки тибқи қонунҳои Эрон донор ва гирандаи узв бояд ҳамватан бошанд ва дар ин ҳол шахс метавонад аз як ҳамватани худ узв қабул кунад.

“Соли гузашта чор амалиёти пайванди ҷигар аз донорҳои зинда барои як бемори эронӣ ва се бемори ғайриэронӣ аз кишварҳои Ироқ ва Сурия анҷом дода шуд”- гуфт доктор Холиқӣ.

Дар ҷаҳон имрӯз кочоқи узви бадани инсон ба мушкили умда табдил шудааст. Дар бархе кишварҳо пайванди узвҳои бадан ба шаҳрвандони хориҷӣ мамнуъ аст. Ҳамчунин, дар аксари кишварҳои дунё қонунҳои сахтгирона барои пешгирӣ аз қочоқи аъзои бадани инсон қабул шудааст.

Dialog.tj