Дар пойтахти Ӯзбекистон шаҳри Тошканд ҳамоиши байналмилалии илмӣ-амалӣ зери унвони “Дипломатияи об дар Осиёи Марказӣ: эътимод, муколама ва ҳамкории бисёрҷониба ба манфиати рушди устувор” баргузор гардид.

Ҳамоиш аз сӯйи Институти таҳқиқоти стратегии назди президенти Ӯзбекистон ташкил шуда, дар он намояндагони доираҳои илмӣ, созмонҳои байналмилалӣ, мутахассисони соҳаи хоҷагии об ва таҳлилгарон аз кишварҳои Осиёи Марказӣ ва Аврупо ширкат намуданд. Нахустин бор дар чунин формати ҳамоиш намояндагони Афғонистон иштирок намуданд.

“Ҳамоиши имрӯз на фақат як форуми илмӣ, балки ба як платформаи пурраи сиёсиву коршиносӣ мубаддал гардид. Мо мутахассисонро аз кишварҳои Осиёи Марказӣ ва муассисаҳои байналмилалӣ, аз ҷумла Институти байналмилалии идоракунии захираҳои об, Агентии ҳамкории Швейтсария ва дигар ниҳодҳо сари як миз ҷамъ намудем. Ин нишонаи таваҷҷуҳи баланди тарафҳо ба ташкили ҳамкории устувори обӣ мебошад, изҳор дошт муовини аввали Директори Институти таҳқиқоти стратегии назди Президенти Ӯзбекистон Акрамҷон Неъматов.

Тибқи гуфтаи ӯ, мавзӯи истифода ва мудирияти оқилонаи захираҳои обӣ барои кишварҳои минтақа аҳамияти бештар касб мекунад.

“Масъалаи марбут ба захираҳои об ба тамоми кишварҳои минтақа рабт доранд. Маҳз дипломатияи об, ки бар пояи эътимод ва ҳамдигарфаҳмӣ асос ёфтааст, имкон медиҳад, мувозинати манфиатҳо нигоҳ дошта шавад ва қарорҳои дарозмуддати судманд таҳия гардад. Мо онро на танҳо як абзори ҳамкорӣ, балки як стратегияи рушди устувори минтақавӣ медонем” – гуфтааст Акрамҷон Неъматов.

Ӯ, ҳамчунин ба зиёд шудани иштироки Афғонистон дар равандҳои минтақавӣ ишора карда чунин гуфт: “Ҳанӯз дар солҳои 1990-ум дарк шуда буд, ки Афғонистон бояд ба музокироти обӣ ҷалб шавад. Мо ҳавзаҳои обии муштарак дорем ва бидуни ширкати ин кишвар наметавон аз идоракунии ҳамаҷонибаи захираҳои обӣ ҳарф зад. Аммо дар он давра, дар Афғонистон вазъият ноустувор боқӣ монда буд. Имрӯз дар он кишвар ҳукумат ташаккул ёфтааст, ки ба субот, амният ва идоракунии самаранок мекӯшад”.

Dialog.tj