Тибқи маълумоти дастрас, 13-уми апрел дар Ҷумҳурии Тоҷикистон се заминларза ба қайд гирифта шуд, ки дар пайи худ хисороти ҷонӣ ҳам доштанд.

Мувофиқи иттилои Хадамоти геофизикии Академияи миллии илмҳои Ҷумҳурии Тоҷикистон, бори якум соати 09:24 дақиқа дар  ҳудуди кишвар заминларза ба қайд гирифта шуд. Маркази он 160 километр шимолу-шарқи шаҳри Душанбе, 21 километр шарқи ноҳияи Рашт буда, қувваи заминларза дар марказаш 5-6-балл, дар ҳудуди минтақаи Рашт 4-5 балл ва шаҳри Душанбе 3-баллро ташкил додааст.

Гуфта мешавад, ки дар асари заминларзаи якум дар ҳудуди деҳаҳои Сафедкунда, Гулханӣ, Кӯл, Аскалони ҷамоати деҳоти Аскалони ноҳия Рашт 17 хонаи истиқоматӣ, 1 бинои муассисаи таълимӣ (мактаби №56 деҳаи Гулханӣ ва дар ҷамоати деҳоти Хиҷборак деҳаи Хулак 1 хонаи истиқоматӣ) дар умум 17 хонаи истиқоматӣ ва 1 муассисаи таълимӣ зарар дида, ноболиғ Машрабов Абдуғанӣ Шарҳиддинович,  соли таваллудаш 2022, сокини деҳаи Уштурпасти ҷамоати деҳоти Ҳиҷборак  зери девори хонаи истиқоматӣ монда, ба ҳалокат расидааст.

Ҳамчунин, зикр мегардад, ки дар ҳудуди деҳаҳои Кӯл, Бӯстон ва Анвар Қаландарови ҷамоати деҳоти Лангари-Шоҳ ва деҳаи Ғанишоби ҷамоати деҳоти Қалъаи лаби оби ноҳияи Тоҷикобод, тибқи маълумоти пешакӣ ба 12 хонаи истиқоматӣ ва иншооти ёрирасон дар ин зилзила зарар дид.

Дирӯз бори дуюм соати 12:14 дақиқа дар ҳудуди кишвар заминларза ба қайд гирифта шуд. Маркази он 163 километр шимолу-шарқи шаҳри Душанбе, 29 километр шарқи ноҳияи Рашт буда, қувваи заминларза дар марказаш 4 балл, дар ҳудуди  минтақаи Рашт 2-3 баллро ташкил дод. Сокинони пойтахти кишвар бошад, заминларзаи дуюмро эҳсос накарданд.

Dialog.tj