Дар Академияи Гвардияи миллии Ҷумҳурии Қазоқистон, ки дар шаҳри Петропавловский ҷойгир аст, миёни донишҷӯёни курси аввал муноқишаи гурӯҳӣ рух додааст. Дар ин хусус расонаҳои Қазоқистон иттилоъ медиҳанд.

Тибқи иттилоъ, дар задухӯрд ё ошӯб 41 курсант ширкат намудаанд, ки 16 нафари онҳо шаҳрвандони Ҷумҳурии Тоҷикистон мебошанд. Дар натиҷаи ин ҳодиса иштирокчиёни ошӯб осебҳои сабуки ҷисмонӣ бардоштаанд. Ягон нафар кушта ё дар бемористон бистарӣ нашудааст.

Ҳоло дар Академияи Гвардияи миллии Қазоқистон феълан 44 шаҳрванди Тоҷикистон таҳсил мекунанд. Онҳо курсантҳое мебошанд, ки дар асоси ҳамкорӣ миёни кишварҳои узви Созмони аҳдномаи амнияти Дастаҷамъӣ ба таҳсил фаро гирифта шудаанд. Аз ин теъдод, 16 нафар донишҷӯёни курси аввал дар ошӯби гурӯҳӣ иштирок намудаанд.

Ҳоло дар ин муассисаи таълимӣ санҷиши хизматӣ идома дорад. Масъулони муассиса ҳолати рух додани задухӯрд ва масъулияти ҳар як донишҷӯи иштирокчиро месанҷанд.

Dialog.tj