Бар асоси пешбинии Бонки рушди Осиё (БРО) иқтисоди Тоҷикистон дар солҳои 2025-2026 ба рушди худ идома медиҳад. Тибқи пешбинии ин ниҳоди иқтисодии ҷаҳонӣ маҷмӯи маҳсулоти дохилии Тоҷикистон дар соли 2025 7,4% ва дар соли 2026 6,8% рушд мекунад. Иқтисоди Тоҷикистон дар соли 2024  8,4 дарсад афзоиш доштааст.

Бонки рушди Осиё пешбинӣ дар мавриди рушди иқтисодии Тоҷикистонро дар гузорише бо номи “Шарҳи рушди Осиё” эълон намудааст.

Гуфта мешавад, ки рушди иқтисоди Тоҷикистон аз ҳисоби сармоягузориҳои бузург дар соҳаи энергетика, саноат, талаботи баланди истеъмолӣ ва рушди бахши хусусӣ суръат мегирад. Бар асоси таҳлили коршиносони соҳа иқтисоди Тоҷикистон бо истифода аз иқтисоди рақамӣ ва идоракунии электронӣ суръати рушди бештарро таҷриба хоҳад кард.

“Ҳукумати Тоҷикистон ба табдили рақамӣ ҳамчун унсури калидии рушди кишвар афзалият медиҳад”- таъкид кард Уо Сакамото, намояндаи доимии Бонки рушди Осиё дар Тоҷикистон.

Намояндаи Бонки рушди Осиё дар Тоҷикистон таъкид кард, ин ниҳоди молиявӣ омода аст, барои бардоштани монеаҳои асосӣ, аз ҷумла камбуди сармоягузорӣ дар бунёди зерсохтори чандири рақамӣ барои расонидани хизматрасониҳои давлатии босифат ба Тоҷикистон кумак кунад.

Тибқи гузориш, дар соли 2025 сатҳи таваррум 5% ва дар соли 2026 низ ба 5, % фоиз хоҳад расид. Сабабҳои асосии рушди таваррум афзоиши қарзҳои истеъмолӣ, болоравии музди меҳнати кормандони давлатӣ, нафақа ва тарифҳо барои хизматрасониҳои коммуналӣ аст.

Dialog.tj