Кумитаи давлатии амнияти миллии Қирғизистон боз аз кӯшиши созмондиҳии ошӯбҳои оммавӣ ва табаддулоти давлатӣ, ки аз хориҷ тарҳрезӣ шудааст, пешгирӣ кард.

Тибқи иттилои расмӣ, аз ибтидои соли 2025 гурӯҳи мушаххас зери роҳбарии ашхоси иғвогар барои ташкили бетартибиҳо дар Бишкек омодагӣ дидаанд. Яке аз саркардаҳои гурӯҳ дар хориҷи кишвар қарор дошта, ба эҳтимоли зиёд дар Аморати Муттаҳидаи Арабӣ паноҳ бурдааст.

Мақомоти амниятии қирғиз тамоми аъзои гурӯҳ, аз ҷумла роҳбарони сатҳи миёнаро мушаххас ва боздошт кардаанд. Ин гурӯҳ ният дошта навори сохтаеро паҳн намояд, ки дар он як зани қирғиз бо нишонаҳои латукӯб ва ба гуфтаи онҳо мавриди таҷовузи шаҳрвандони хориҷӣ қарор гирифтааст. Навор бояд эҳсосоти миллӣ ва ғазаби ҷавононро барангезад ва онҳоро ба гирдиҳамоӣ таҳрик диҳад.

Бар асоси нақша, баъди нашри навор гурӯҳҳои мусаллаҳ дар нуқтаҳои мухталифи Бишкек ба иғво, шикасти амвол ва ҳамла ба шаҳрвандони хориҷӣ даст мезананд. Ҳамзамон, иқдоми иғвогарона бар зидди шаҳрвандони маҳаллӣ ва кормандони мақомоти ҳифзи ҳуқуқ тарҳрезӣ шуда буд.

Кумитаи давлатии амнияти миллии Қирғизистон таъкид кард, ки мақсади асосии чунин амалҳо беэътибор намудани сохторҳои идоракунии давлат ва барангехтани норозигии мардум барои ташкили эътирозҳои бузург буд, ки  аз тарафи гурӯҳҳои ба ном “оппозитсионӣ” маблағгузорӣ мешуданд.

Тафтишоти пешакӣ нишон додааст, ки роҳандозии чунин амалиёт аз хориҷи кишвар сурат гирифтааст ва дар айни замон кофтукови ҷиноӣ барои боздошти ташкилкунандагони асосӣ идома дорад.

Дар соли 2024 низ Кумитаи давлатии амнияти миллии Қирғизистон як гурӯҳро барои ташкили табаддулоти давлатӣ боздошт карда буд.

Dialog.tj