Президенти Фаронса Эммануэл Макрон эълон кард, ки кишвараш дар моҳи июн Фаластинро ҳамчун як кишвари мустақил ба расмият мешиносад. Ӯ гуфт, ки бархе кишварҳои Ховари Миёна низ метавонанд Фаластинро ба расмият шиносанд.

“Мо бояд ба сӯйи ба расмият шинохтани Фаластин ҳаракат кунем ва ба ҳамин хотир дар чанд моҳи оянда ин корро анҷом хоҳем дод. Ман ин иқдомро барои розӣ кардани касе намекунам” – гуфт президенти Фаронса.

Президенти Фаронса афзуд “онҳое, ки аз Фаластин ҳимоят мекунанд, дар навбати худ Исроилро ба расмият шиносанд, вале инро бисёре аз онҳо анҷом намедиҳанд”.

Фаластин то ба ҳол тақрибан аз сӯйи 150 кишвари ҷаҳон ва созмонҳои ҷаҳонӣ ба унвони як кишвари мустақил ба расмият шинохта шудааст. Аммо аксари қудратҳои бузург, аз ҷумла Амрико, Британия, Фаронса, Олмон ва Ҷопон онро то ба ҳол ба расмият нашинохтаанд ва расимиятшиносии онро ба созиши дуҷонибаи фаластиниҳо ва исроилҳо марбут донистаанд.

Кишварҳо дар Ховари Миёна, аз ҷумла Арабистони Саудӣ, Эрон, Ироқ, Сурия ва Яман Исроилро ба унвони як кишвари мустақил ба расмият намешиносанд.

Президенти Фаронса ба нишасте ишора кард, ки бар асоси гуфтаи ӯ ба раёсати муштараки Арабистони Саудӣ ва Фаронса доир мегардад ва дар он мавзӯи ба расмият шинохтани кишвари Фаластин баррасӣ гардида ва дар ин бора қарори ниҳоӣ қабул мегардад.

“Мақсади мо моҳи июн аст, дар як конфронс зери раёсати Арабистони Саудӣ, кӯшиш мекунем ҳаракат ба сӯйи шинохти мутақобила аз ҷониби чандин кишварро ниҳоӣ кунем” – зикр кард Макрон.

Dialog.tj