Президенти Ӯзбекистон Шавкат Мирзиёев дар суханронии ахираш гуфт, ки зарурати ҳамкорӣ ва муколама бо гурӯҳи террористии Толибон вуҷуд дорад ва ҷомеаи ҷаҳонӣ набояд Афғонистонро дар муҳосира қарор диҳад.

Шавкат Мирзиёев дар иҷлосияи 150-уми Иттиҳоди байнипарлумонӣ, ки дар шаҳри Тошканди Ӯзбекистон баргузор гардид, аз сиёсати ҳамкорӣ бо гурӯҳи террористии Толибон ва ҳукумати феълии Афғонистон бори дигар ҳимоят кард.

Президенти Ӯзбекистон таъкид кард, Афғонистон бояд ҳамчун як қисми ҷудонашавандаи минтақаи Осиёи Марказӣ бо зарфиятҳои зиёди истифоданашуда дар назар гирифта шавад.

“Мо набояд ҳамсояи худ – Афғонистонро фаромӯш кунем. Мо бар онем, ки худдорӣ аз муҳосираи ин кишвар дар саҳнаи ҷаҳонӣ, барқарор намудани муколамаи созанда бо мақомоти кунунӣ ва нигоҳ кардан ба Афғонистон ҳамчун як бахши ҷудонашавандаи Осиёи Марказӣ бо захираҳои табиию истифоданашуда, бисёр муҳим аст. Дар ин замина, мо ба ҳимояти парлумонҳо умед дорем” – таъкид намуд Шавкат Мирзиёев.

Шавкат Миризиёев бо ишора ба таҳдидҳои фарогире, ки дар натиҷаи муноқишаҳои ҷаҳонӣ  ба вуҷуд омадааст, гуфт, ки чунин буҳронҳо сулҳ ва суботи ҷаҳонӣ ва минтақаро таҳдид мекунанд.

Президенти Ӯзбекистон аз садоқати кишвараш нисбат ба ҳалли дипломатии низоъҳо таъкид намуда, гуфт, ки ҳукумати Ӯзбекистон қотеъона аз муколамаи осоишта ҳамчун василаи аслии ҳаллу фасли ихтилофҳо ҳимоят мекунад.

Dialog.tj