Шавкат Мирзиёев, президенти Ҷумҳурии Ӯзбекистон дар ҷараёни форуми иқлим, ки дар доираи ҳамоиши “Иттиҳоди Аврупо-Осиёи Марказӣ” дар шаҳри Самарқанд баргузор гардид, зарурати оғози барномаи минтақавии нав барои татбиқи технологияҳои сарфаи об дар Осиёи Марказиро ба миён гузошт.

Президенти Ӯзбекистон таъкид намуд, ки бар асоси пешбиниҳо то соли 2040 дар натиҷаи коҳиши ҷараёни оби дарёи Омӯ ва Сир Осиёи Марказӣ метавонад бо сатҳи баланди фишори камобӣ рӯ ба рӯ шавад. Ӯ афзуд, ки минтақа аллакай аз оқибатҳои як фоҷеаи бузурги инсонӣ – хушк шудани Баҳри Арал осеб дидааст.

“Дар доираи ин талошҳо, мо ният дорем, ки як форуми байналмилалиро дар минтақаи ҳошияи Арал баргузор намоем, то нақшаҳо ва пешниҳодҳои дахлдор дар сатҳи мутахассисон муҳокима шавад” – гуфт Шавкат Мирзиёев.

Ба таъкиди ӯ, Ӯзбекистон дар роҳи сарфаҷӯии захираҳои обӣ корҳои васеъмиқёсро анҷом дода, шабакаҳои обёриро битонпӯш карда ва пойгоҳҳои саноатиро барои истеҳсоли технологияҳои сарфаи об ташкил намудааст. Ин технологияҳо аллакай дар беш аз 50 фоизи заминҳои обёришавандаи кишвар роҳандозӣ шудаанд.

“Дар натиҷаи ин тадбирҳо соли гузашта ба миқдори тақрибан 8 миллиард метри мукааб об сарфа гардид” – таъкид кард президенти Ӯзбекистон.

Dialog.tj