Созмони Милали Муттаҳид дар гузорише, ки 3-уми апрел нашр кард, ҳушдор дод, зеҳни сунъӣ метавонад то соли 2033 40 дарсад аз касбу кори ҷаҳониро таҳти таъсир қарор диҳад.

Ба таъкиди СММ ин технология, ки пешбинӣ мешавад то соли 2033 арзишаш ба 4,8 триллион доллар расад, ҳамчунон фурсати бузург барои рушди иқтисодӣ ва судоварӣ маҳсуб мегардад. Ин созмон таъкид мекунад, ки зеҳни сунъӣ метавонад судоварияшро афзоиш диҳад.

Ин ниҳоди ҷаҳонӣ изҳори нигаронӣ намудааст, ки зуҳури зеҳни сунъӣ дар оянда таҳдид барои бисёре аз касбу корҳо хоҳад буд. Дар гузориши Созмон таъкид мешавад, ки ба шакли автомотӣ анҷом ёфтани бисёре аз касбу корҳо сабаби аз байн рафтани ҷойҳои корӣ мешавад.

СММ таъкид мекунад, ки манифатҳои зеҳни сунъӣ аксаран ба суди сармоя ба ҷойи кор аст ва ин метавонад нобаробариро афзоиш дода, рақобати неруи арзони кориро дар кишварҳои дар ҳоли рушд коҳиш диҳад.

Ребекка Гринспен, раиси Созмони тиҷорат ва рушди СММ таъкид кардааст, ки бояд инсонҳо дар маркази рушди зеҳни сунъӣ қарор гиранд ва ҳамкориҳои байналмилалӣ барои ташкили як чорчӯби ҷаҳонӣ дар хусуси зеҳни сунъӣ бояд роҳандозӣ шавад.

СММ эълон кард, ки барои истифодаи қобилияти зеҳни сунъӣ ба манфиати рушди устувор, кишварҳои мухталиф бояд аз имрӯз сармоягузорӣ ба инфрасохтори рақамӣ ва тақвияти ҳокимияти зеҳни сунъиро оғоз намоянд.

Ҳамзамон, СММ таъкид мекунад, ки зеҳни сунъӣ фақат ҷойгузини касбу кор намешавад, балки метавонад соҳаҳои нави саноатиро эҷод намуда, дар тавонмандсозии коргарон саҳм гузорад.

Нигаронии СММ дар ҳолест, ки чанде қабл Бил Гейтс изҳор дошт, зеҳни сунъӣ метавонад дар оянда дар бахшҳои тиббу маориф ҷойи табибон ва омӯзгоронро иваз намояд.

Dialog.tj