Як вакили Ҷумҳурии Исломии Эрон дар пасманзари таҳдидҳои пай дар пайи Амрико ва Исроил гуфтааст, ки Эрон барои муқобила бо таҳдидҳои рӯзафзун бояд силоҳи атомӣ дошта бошад.

Аҳмад Нодирӣ, вакили парлумони Эрон дар суҳбат бо расонаҳо гуфтааст, ки идеяи боздорандагии Эрон рӯз аз рӯз тарафдорони бештар пайдо мекунад. Ба гуфтаи ин вакил, навобаста аз он ки президенти Амрико кӣ ҳаст, ҳамеша бо гузинаи низомӣ Эронро таҳдид мекунад. Ин вакили Эрон изҳороти худро баъди таҳдидҳои Амрико матраҳ намудааст.

Қаблан, Алии Лориҷонӣ, мушовири Оятуллоҳ Хоманаӣ, роҳбари Эрон гуфта буд, ки бояд фатвои ҳаром будани сохтани бомбаи атомӣ бекор шавад ва Эрон барои эҷоди қудрати боздорандагӣ ба силоҳи атомӣ ниёз дорад.

Масъуд Пизишкиён, президенти Ҷумҳурии Исломии Эрон ба дархости Доналд Трамп, президенти Амрико барои оғози музокираи мустақим баҳри ҳалли масъалаи атомӣ посухи рад дод ва гуфт, ки дар шароити таҳдид Эрон бо Амрико музокираи мустақим анҷом нахоҳад дод.

Аббос Ироқчӣ дирӯз эълон кард, ки Эрон ба шарти бекор шудани таҳримҳои якҷониба ҳозир ба музокираи ғайримустақим бо Иёлоти Муттаҳидаи Амрико аст. Ӯ гуфт, ки дар шароити таҳдид ва зӯргӯӣ Эрон бо музокираи мустақим мухолиф аст.

Dialog.tj