Маркази хабарнигорони Афғонистон дар гузориши солонаи худ гуфт, ки дар соли 2024 нақзи ҳуқуқи рӯзноманигорон ва расонаҳо 24% афзоиш ёфтааст. Ин марказ таъкид кард, ки дар соли ҷорӣ 172 мавриди нақзи ҳуқуқ, аз ҷумла қатъи фаъолияти 22 расона ва боздошти 50 рӯзноманигор аз сӯйи Толибон сабт шудааст.

Ин марказ хабар дод, ки фишори Толибон ба озодии матбуот дар 12 моҳи гузашта бештар шудааст ва сатҳи поймолшавии ҳуқуқи рӯзноманигорон афзоиш ёфтааст.

Маркази хабарнигорони Афғонистон дар гузориши вижа зикр кардааст, ки 122 мавриди таҳдид, 22 мавриди қатъи фаъолияти расонаҳо, 50 мавриди боздошти рӯзноманигорон аз ҷониби гурӯҳи террористии Толибон сурат гирифтааст. Дар гузориш зикр шудааст, ки 15 расона то ба ҳол иҷозаи дубораи фаъолият нагирифтаанд ва 10 рӯзноманигор ҳанӯз дар зиндон ба сар мебаранд.

Дар гузориш таъкид мешавад, ки баъди татбиқи қонуни “Амр ба маъруф” –и Толибон нозирони мазҳабии ин гурӯҳ назорати шадидтар аз болои расонаҳоро ба роҳ мондаанд. Дар ин гузориш таъкид мешавад, ки онҳо ҳамроҳ ба хадамоти истихбороти Толибон сиёсати маҳдудкунии расонаҳоро иҷро мекунанд.

Маркази хабарнигорон мегӯяд, ки Комиссияи расидагӣ ба шикояти расонаӣ ба ҳошия ронда шудааст ва дар ин муддат 5 дастури маҳдудкунандаи нав бар зидди расонаҳо содир шудааст, ки иборат аст аз: манъи нашри тасвири ҳайвонҳои зинда, манъи пахши зиндаи барномаҳои сиёсӣ, манъи барномаҳои интиқодӣ, манъи даъвати меҳмонон бидуни ҳамоҳангӣ бо Толибон, маҷбур намудани расонаҳо ба истифодаи калимаҳои “шаҳид” ва “шаҳодат”.

Dialog.tj