Созмонҳои байналмилалӣ нигаронӣ мекунанд, ки дар блокада қарор додани Ғазза аз сӯйи Исроил метавонад боиси фоҷеаи инсонӣ ва ташнагии беш аз 90 фоизи мардуми минтақаи Ғазза шавад. Ин созмонҳо гуфтаанд, 90 фоизи аҳолии Ғазза ба оби ошомиданӣ дастрасӣ надоранд.

Тайи 10 рӯзи ахир Исроил блокадаи Ғаззаро сахттар кардааст ва иҷоза намедиҳад, ки кумакҳои башардӯстона вориди ин минтақа шавад. Дар пайи ин иқдоми Исроил созмонҳои байналмилалӣ вазъияти Ғаззаро бисёр нигаронкунанда арзёбӣ мекунанд.

Филипп Лазарини, комиссари кулли Оҷонсии Созмони Милали Муттаҳид барои ёрӣ ба гурезаҳои Фаластин (UNRWA) эълон кард, ки пас аз 10 рӯзи манъи расонидани кумакҳои башардӯстона ва имконоти асосӣ аз сӯйи Исроил, вазъият дар ин минтақа ба ҳолати моҳи октябри соли 2023 монанд шудааст. Ӯ гуфтааст, ки тасмими блокадаи Ғазза ҷони ҳазорон ғайринизомиро дар зери хатар қарор медиҳад.

Филипп Лазарини дар нишасти хабарӣ дар Женава амалкарди душманонаи Исроил бар зидди UNRWA – ро маҳкум намуд ва гуфт, ин тасмими Исроил на танҳо ба UNRWA, балки бар ҳар созмоне, ки аз ҳуқуқи фаластиниҳо дифоъ мекунад, рабт дорад. Ӯ гуфт, пас аз мамнуъ шудани фаъолияти UNRWA фишорҳо барои холӣ намудани биноҳои оҷонсӣ ва қатъи хидматрасонӣ ба фаластиниҳоро афзоиш додааст ва кормандони байналмилалӣ амалан аз Каронаи Бохтарӣ  хориҷ шудаанд. Намояндаи созмони UNRWA гуфт, ки ҳанӯз баъзе аз кормандони байналмилалӣ дар Ғазза боқӣ мондаанд, вале Исроил ба онҳо иҷозати фаъолият намедиҳад.

Филипп Лазарини таъкид намудааст, ки ҳамлаҳои неруҳои Исроил ба ин минтақа, ки аз 6 ҳафта пеш оғоз шудааст, зиндагии фаластиниёнро ба таври ҷиддӣ таҳти таъсир қарор додааст. Дар натиҷаи ин ҳамлаҳо беш аз 40 ҳазор фаластинӣ овора шудаанд, ки ин бузургтарин оворашавии фаластиниён дар Каронаи Ғарбӣ аз соли 1967 то ба имрӯз аст.

Ин гузориш дар ҳоле нашр мешавад, ки ба гуфтаи Хазинаи байналмилалии кӯдакони СММ (ЮНИСЕФ) буҳрони норасоии об дар Ғазза ба сатҳи хатарнок расидааст. Бар асоси гузоришҳо танҳо қисми кам метавонанд ба оби ошомиданӣ дастрасӣ пайдо кунад ва 90 фоиз аз оби ошомиданӣ маҳрум мебошанд. Розалия Полин, масъули ЮНИСЕФ гуфт, ки моҳи ноябри соли 2024, баъди як давраи тӯлонӣ 600 ҳазор нафар дар Ғазза тавонистанд ба оби ошомиданӣ дастрасӣ пайдо кунанд, ки дубора об қатъ шуд.

Dialog.tj