Ҳукумати нави Сурия 10-уми марти соли 2025 бо Неруҳои демократии Сурия созишномаи муҳиммеро имзо кард. Тибқи созишнома ниҳодҳои шаҳрвандӣ ва низомии ҳукумати худмухтори курдҳо дар шимолу шарқи Сурия ба сохторҳои ҳукумати нави Сурия мепайванданд.

Ин созишнома аз сӯйи роҳбари муваққати Сурия Аҳмад Ал-Шаръ ва фармондеҳи Неруҳои демократи Сурия Мазлум Абдӣ имзо шудааст. Ин созишнома оташбаси саросариро дар бар мегирад ва интизор меравад то охири сол амалӣ гардад.

Тибқи ин созишнома тамоми гузаргоҳҳои марзӣ, фурудгоҳҳо, конҳои нафту газ, инчунин, маҳбасҳое, ки дар он муттаҳамони гурӯҳи террористии ДОИШ нигоҳ дошта мешаванд, таҳти назорати ҳукумати марказӣ қарор мегирад.

Ин созишнома ҳуқуқи ақалияти курдҳоро ба расмият мешиносад. Он ҳамчунин, имкон медиҳад, ки курдҳо ба забони модарии худ дар Сурия таълим гиранд. Ҳамчунин, ба гурезаҳои курд шароит  муҳайё мегардад, ки ба ватани худ баргарданд.

Ин созишномаи ҳукумати нави Сурия дар ҳоле имзо мешаванд, ки ҳафтаи гузашта неруҳои низомии ҳукумати нав дар қисматҳои алавинишини ин кишвар амалиёти низомӣ гузарониданд. Дар натиҷаи задухӯрди неруҳои ҳукумати нав бо ақалияти курдҳо беш аз 1000 нафар, аз ҷумла 745 ақалияти алавӣ кушта шуданд.

Dialog.tj