Президенти Ҷумҳурии Тоҷикистон муҳтарам Эмомалӣ Раҳмон дар маҷлиси тантанавӣ ба муносибати Рӯзи Модар қайд карданд, ки дар ҳоли ҳозир зиёда аз 13 ҳазор нафар духтари тоҷик дар мактабҳои миёна ва олии касбии кишварҳои хориҷӣ таҳсил карда истодаанд.

Гуфтан ба маврид аст, ҳоло дар умум 42 ҳазору 315 нафар ҷавонони тоҷик дар 42 давлати дунё таҳсил мекунанд, ки аз ин шумора 30 фоизро духтарон ташкил медиҳанд.

Гуфта шуд, ки ҳоло 100 ҳазор духтар дар муассисаҳои таҳсилоти олии касбии мамлакат ба омӯхтани илму дониш ва касбу ҳунар машғул мебошанд.

Сарвари давлат илова намуданд, ки танҳо дар даҳ соли охир 11 ҳазор духтар муассисаҳои таҳсилоти олии касбиро бо квотаи президентӣ хатм намудаанд.

Гузашта аз ин, дар замони соҳибистиқлолӣ беш аз 256 ҳазор нафар духтар баъди хатми муассисаҳои таҳсилоти олӣ соҳиби маълумоти олӣ ва касбу ҳунар гардидаанд.