Раёсати кор бо ҷавонон ва варзиши шаҳри Душанбе хабар медиҳад, ки  барои муҳаққиқони ҷавон дар самти илмҳои дақиқ, адабиёт, рӯзноманигорӣ, санъат, меъморӣ, техникаю технология ва инноватсияю ихтироъкорӣ Ҷоизаи раиси шаҳри Душанбе таъсис ёфт. 

Манбаъ меафзояд, ки ҷоизаи мазкур бо ҳадафи қадрдонии муҳаққиқони ҷавон, баланд бардоштани лаёқати эҷодӣ ва рушду инкишофи иқтидори илмӣ пешнибинӣ шудааст.

Гуфта мешавад, ки ҷоизаҳо аз рӯйи илмҳои дақиқ – фаъолияти илмию эҷодӣ дар самти рушди илмҳои табиатшиносӣ, дақиқ ва риёзӣ; адабиёт – китобҳои илмӣ, бадеӣ, адабӣ, ашъор, осор; рӯзноманигорӣ – мақолаҳо, маводи иттилоотӣ, барномаҳои телевизионӣ ва радиоӣ, гузоришҳои хабарӣ; санъат – сарояндагӣ, раққосӣ, тарроҳӣ, ҳунармандии саҳнавӣ, расмҳои кашидаи дорои хусусияти тарбиявӣ, портрет, пейзаж, нақшу нигор ва ғайра; меъморӣ – лоиҳаҳои сохтмонӣ, боғу гулгаштҳои фарҳангию фароғатӣ, марказҳои ҷавонон, фаввораҳо, майдончаҳои варзишӣ ва ғайра, ки истифодаи онҳо ба шароити шаҳри Душанбе мувофиқ бошад; техникаю технология – такмили сохти таҷҳизот ва мошинҳо, такмили конструксияҳои сохтмонӣ, бино ва иншоот, сарфаи энергия ва манбаъҳои барқароршавандаи энергия, баланд бардоштани самаранокии истеҳсолот, истеҳсоли маҳсулоти воридотивазкунанда, такмили фаъолияти меҳнатӣ, паст кардани таъсири буҳрони молиявию иқтисодӣ, барномасозӣ, ихтироъкорӣ дар самти технологияҳои иттилоотӣ, компютерӣ; инноватсияю ихтироъкорӣ – татбиқи коркардҳои инноватсионӣ дар самти рушди неруи инсонӣ, рушди инфрасохтор, амалан татбиқ кардани чор ҳадафи стратегии мамлакат, кам кардани сатҳи камбизоатӣ, бехатарии фаъолияти инсон ва экология, амалисозии усулҳои нави таълим ва таҳқиқоти илмӣ, истифодаи маводи навин бар ивази маводи мавҷуда ва истифодаи технологияҳои иттилоотӣ баҳогузорӣ карда мешаванд.

Довталабон ҳуҷҷатҳояшонро то 31-ум март дар Раёсати кор бо ҷавонон ва варзиши шаҳри Душанбе пешниҳод карда метавонанд.

Dialog.tj