Як сокини 41-солаи Тоҷикистон ҳамсари пешини худ, зани 32- сола аз ноҳияи Варзоби Тоҷикистонро бо сабаби ҳисси рашк дар шаҳри Санкт–Петербурги Русия ба қатл расонидааст.

Вазорати корҳои дохилии Тоҷикистон иттилоъ медиҳад, ки фоҷеа рӯзи 3-уми феврали соли 2025 рух додааст.

Тибқи иттилоъ, мард соли 2023 бо ин зан никоҳи исломӣ баста, баъди ду соли зиндагӣ аз ҳам ҷудо мешаванд. Дар моҳи феврали соли 2025 мард ҳамсари пешинашро дар ҷойи кораш таъқиб намуда ва оқибат аз дохили таксӣ ӯро маҷбуран ба мошини худ савор мекунад.

Дар вақти дар дохили мошин будан, миёни онҳо муноқишаи лафзӣ сар мезанад. Дар натиҷаи рашк мард таҳти таъсир қарор гирифта, ӯро латукӯб мекунад. Дар натиҷаи зарбаҳои сахт ҷабрдида дар ҷойи ҳодиса ба ҳалокат мерасад.

Баъди анҷом додани қатл, мард кӯшиш мекунад, ки осори ҷиноятро нобуд созад ва ҷасади собиқ ҳамсарашро бурда дар ҷангал пинҳон мекунад. Баъдан, ӯ аз Федератсияи Русия хориҷ шуда, ба Тоҷикистон бармегардад.

Кормандони полис дар ҷараёни гузаронидани чорабиниҳои фаврӣ-ҷустуҷӯӣ муттаҳам ба қатлро дар ноҳияи Рӯдакӣ боздошт мекунанд.

Ҳамакнун бар зидди ӯ парвандаи ҷиноятӣ боз шуда, ҳоло ӯ дар ҳабси пешакӣ  қарор дорад.

Dialog.tj