Роҳбарияти Чин барои пешгирӣ аз ифшои иттилооти махфӣ ва пешрафти технологияи Чин аз соҳибкорону пажӯҳишгарони барҷастаи ин кишвар оид ба зеҳни сунъӣ дархост намуд, ки аз сафар ба Амрико ва кишварҳои ҳампаймони он худдорӣ кунанд.

Ҳукумати Чин таъкид кардааст, ки соҳибкорону роҳбарони ширкатҳои бузурги чинӣ, ки дар самтҳои ҳассос, ба мисли роботтехника ва зеҳни сунъӣ фаъолият доранд, бахусус, аз сафар ба Иёлоти Муттаҳидаи Амрико ва кишварҳои ҳампаймони он сарфи назар кунанд. Дар ин дархост зикр шудааст, ки фақат дар ҳолатҳои зарурӣ ба сафар ба ин кишварҳо иҷозат дода мешавад.

Инчунин, аз роҳбароне, ки қасди сафар доранд, дархост шудааст, пеш аз сафар нақшаҳои худро ба мақомот гузориш диҳанд ва баъди сафар ҳисоботи мулоқот ва фаъолияҳои худро пешниҳод намоянд.

Бар асоси гузориши расонаҳо мақомоти чинӣ ҳарос доранд, ки сафари пажӯҳишгарон ва роҳбарони ширкатҳои бузурги зеҳни сунъӣ ба Иёлоти Муттаҳидаи Амрико сабаби ифшо шудани иттилооти муҳимми кишварашон мешавад.

Мақомоти чинӣ эҳтимоли боздошти пажӯҳишгарон ва роҳбарони ширкатҳои чинӣ ва истифодаи онҳо дар ҷараёни музокироти Чин ва Амрикоро хатарнок медонанд. Ин ҳушдор дар ҳоле садо медиҳад, ки дар солҳои гузашта мудири иҷроияи “Huawei” дар Канада, дар даври аввали президентии Доналд Трамп боздошт шуда буд.

Тибқи гузориши мақомоти Чин моҳи гузашта Лян Вэнфэн, асосгузори зеҳни сунъии DeepSeek даъватномаи ширкат дар нишасти зеҳни сунъӣ дар шаҳри Парижи Фаронсаро рад карда буд. Ҳамчунин, яке аз асосгузорони дигари стартапҳои бузурги зеҳни сунъии Чин соли гузашта баъди дарёфти дастури Пекин сафари худ ба Амрикоро лағв кард.

Ин дархост ва гузориши мақомоти Чин дар ҳоле сурат мегирад, ки Чин ва Амрико дар заминаи зеҳни сунъӣ рақобати шадид доранд. Дар моҳҳои ахир стартапи чинии DeepSeek модели зеҳни сунъиеро пешниҳод кард, ки тибқи гуфтаи ширкат, бо моделҳои зеҳни сунъии пешрафтаи Амрико, ба мисли  OpenAI ва Google рақобат мекунад. Модели чинии зеҳни сунъӣ ба далели нархи паст доштан аз моделҳои амрикоӣ пеш гузаштааст.

Чанде қабл Си Ҷинпин, президенти Чин дар нишасти нодир бо баъзе аз шахсиятҳои шинохтаи саноати технология аз онҳо хост, ки “истеъдоди худро нишон диҳанд” ва ба қудрати модел ва бозори Чин эътимод дошта бошанд.

Dialog.tj