Филми мустанади фаластинии “Сарзамини дигаре нест”, ки дар хусуси фоҷеаи қатлу куштор ва кӯчонидани иҷбории фаластиниҳо ривоят мекунад, дар ҷашнвораи ҷаҳонии Оскар дар Лос-Анҷелеси Амрико сазовори ҷоиза шуд.

Дар пайи ин вазири фарҳанги Исроил Мики Зоар вокуниш нишон дода, иддао кард, ки ривоятҳои тасвиршуда дар филми мазкур таҳрифшуда ва асли воқеият нестанд. Ӯ гуфтааст: “Додани ҷоизаи Оскар ба филми “Сарзамини дигаре нест” лаҳзаи ғамангезе барои дунёи синамо буд. Созандагони ин филм ба ҷойи ироаи мушкилоту воқеият ривоятҳоеро пешниҳод карданд, ки чеҳраҳои Исроилро вайрон мекунад”.

Дар филми мустанади “Сарзамини дигаре нест” ҳунарпешаи фаластинӣ Базил Адра нақш офаридааст. Муҳтавои филм дар хусуси ҳамлаҳои ваҳшиёнаи артиши Исроил ба хоки Фаластин аст. Дар он нишон дода мешавад, ки артиши Исроил бо кӯчонидани иҷбории мардуми Фаластин ва вайрон кардани хонаҳои онҳо пойгоҳҳои низомиашро месозад. Тасвири ин нукта, ки артиши Исроил дар ҷойи хонаҳои вайроншудаи фаластиниён қароргоҳ месозад, бисёр барҷаста тасвир шудааст.

97-умин маросими супоридани ҷашнвораи Адвардз, ки бештар бо номи Оскар маъруф аст, рӯзи душанбе дар шаҳри Лос-Анҷелес баргузор шуд.

Dialog.tj