Раиси Шурои уламои Ҷумҳурии Тоҷикистон Сайидмукаррам Абдулқодирзода дар арафаи моҳи Рамазон аз соҳибкорону тоҷирон даъват намуд, нархи маҳсулоти ниёзи аввали мардумро боло набаранд.

“Баланд бардоштани нархи маводи ғизоӣ дар ин моҳ ба хотири манфиати шахсӣ, яке аз бадтарин амалҳо маҳсуб мешавад. Ин рафтор дар ислом маҳкум шудааст” – таъкид кард Сайидмукаррам Абдулқодирзода.

Сайидмукаррам Абдулқодирзода ба онҳое, ки ба мардум хизмат мерасонанд, хотиррасон кард, ки дар тиҷорат  ростқавлӣ ва адолат асли муҳим ба ҳисоб меравад. Ӯ таъкид намуд, ашхоси саховатпеша дар моҳи мубораки Рамазон ба ятимону маъюбон, камбизоатону хонаводаҳои ниёзманд кумак расонанд.

“Дар ин моҳи шариф ҳамватанони мо бояд ба шахсони солхӯрда меҳрубонӣ зоҳир кунанд, ба беморон ғамхорӣ намоянд, ҳамсояҳоро дастгирӣ кунанд ва ба онҳое, ки дар ҳолати мушкилот қарор доранд, ёрӣ расонанд”- таъкид кард ӯ.

Шурои уламои Ҷумҳурии Тоҷикистон рӯзи 1-уми мартро оғози моҳи Рамазон эълон кард.

Dialog.tj