Мақомоти Қазоқистон дар ҳоли таҳия намудани лоиҳаи фармоне ҳастанд, ки тибқи он содироти нафти ин кишвар ба хориҷ, аз ҷумла кишварҳои узви Иттиҳоди иқтисодии Авруосиё барои шаш моҳ манъ мешавад.

Лоиҳаи манъи содироти шашмоҳаи нафти Қазоқистон дар портали “Открытые НПА” нашр гардидааст.

Тибқи иттилоъ, вазоратҳои энергетика, молия, корҳои дохилӣ ва Кумитаи амнияти миллии (КАМ)-и Қазоқистон лоиҳаи фармони муштарак “Дар бораи баъзе масъалаҳои содироти маҳсулоти нафтӣ аз ҳудуди Ҷумҳурии Қазоқистон”-ро таҳия кардаанд.

Ин фармон содироти нафти Қазоқистонро барои шаш моҳ ба кишварҳои хориҷ, аз ҷумла кишварҳои узви Иттиҳоди иқтисодии Аврупосиё” манъ мекунад.

“Айни замон дар кишвар афзоиши ғайримуқаррарии истеъмоли бензини навъи АИ-92 ва сӯзишвории дизелӣ мушоҳида мешавад. Ба иттилои мақомоти ҳифзи ҳуқуқ, ҳаҷми содироти ғайриқонунии сӯзишворӣ ва равғанҳои молиданӣ (ГСМ) ҳар моҳ аз 10 то ба 15 ҳазор тонна мерасад. Сабаби асосӣ фарқияти нархҳо мебошад. Дар Қазоқистон нархи сӯзишворӣ 17-166% аз нархи кишварҳои ҳамсоя камтар аст”.

Ҳамчунин, бар асоси созишнома дар бораи таъминоти нафт ва маҳсулоти нафтӣ Қазоқистон маҷбур аст, ки маҳсулоти нафтиро бо шароити таъминоти бидуни боҷ ворид намояд ва мутаносибан талаботи Русияро дар бори манъи реэкспорти сӯзишворӣ берун аз ҳудуди Иттиҳоди иқтисодии Авруосиё ба назар гирад.

Бо ин сабаб, зарурати тақвияти назорати содироти нафтӣ пеш омадааст.” – таъкид мекунад Вазорати энергетикаи Қазоқистон.

Бар асоси иттилои расонаҳои қазоқистонӣ баррасии лоиҳаи фармони мазкур то 14-уми март идома хоҳад дошт.

Dialog.tj