Раиси Кумитаи амнияти миллии Қирғизистон Қамчибек Ташиев таъкид кард, 27-уми феврал созишнома дар бораи делимитатсияи марзи Қирғизистон ва Тоҷикистон барои баррасӣ ба комитетҳои марбутаи парлумон пешниҳод мешавад. Қамчибек Ташиев ин масъаларо рӯзи 26-уми феврал ҳангоми санги асос гузоштан ва оғози сохтмони варзишгоҳи нав дар вилояти Бодканд баён кард.

Қамчибек Ташиев дар суҳбат бо сокинони вилояти Бодканд таъкид кард, ки баҳси марзӣ ҳал шудааст ва масъалаи барасмиятдарории ҳуҷҷатҳои имзошуда як моҳро дар бар хоҳад гирифт.

 “Пагоҳ (манзур 27 феврал) дар маҷлиси якҷояи комитетҳои парлумон ин масъала муҳокима мешавад. Баъди он сарварони ду кишвар ҳуҷҷатҳоро имзо мекунанд. Мо барасмиятдарории ҳуҷҷатҳоро дар маҷлиси васеъ баргузор мекунем. Баъди он сарони ду кишвар ҳуҷҷатҳоро имзо мекунанд, ки эътибори ҳуқуқӣ пайдо мекунад. Ҳамаи ин корҳо дар давоми як моҳ анҷом хоҳад ёфт” - таъкид кард Қамчибек Ташиев.

Ёдовар мешавем, ки рӯзи 21-уми феврали соли ҷорӣ раиси Кумитаи давлатии амнияти милии Ҷумҳурии Тоҷикистон Саймумин Ятимов ва раиси Кумитаи давлатии амнияти миллии Қирғизистон Қамчибек Ташиев созишномаҳои ниҳоии сарҳадиро ба имзо расониданд. Баъди имзои ин санадҳо ҳар ду тараф таъкид карданд, ки масъалаи баҳси марз миёни ду кишвар ҳал шуд.

Dialog.tj