Дар ду рӯзи охир бинобар бориши зиёди барф ва ҳавои сарду яхбандӣ кормандони Вазорати ҳолатҳои фақулодаи Қазоқистон беш аз 170 нафарро наҷот додаанд.

Расонаҳои Қазоқистон бо такя ба Вазорати ҳолатҳои фавқулодаи ин кишвар хабар медиҳанд, ки наҷотдиҳандагони қазоқ як автобус ва як мошини сабукравро, ки дар он шаҳрвандони Тоҷикистон қарор доштанд, наҷот додаанд.

Бар асоси иттилоъ, дар роҳи байналмилалии Екетеренбург-Алмаато - сарҳади Федератсияи Русия, дар наздикии деҳаи Қайроқи ноҳияи Қарабалиқ як автобуси мусофиркашонӣ, ки аз самти Тоҷикистон ба Федератсияи Русия ҳаракат мекард, бо сабаби бориши барф ва ях кардани сӯзишвории дизелӣ аз  ҳаракат бозмонда аст.

Дар дохили автобуси Тоҷикистон, ки ба самти Федератсияи Русия ҳаракат дошт, 70 шаҳрванди Тоҷикистон, аз ҷумла 40 кӯдак қарор доштаанд. Гуфта мешавад, ки мақомоти наҷотдиҳанда ба ҷойи ҳодиса расида, бо таҷҳизоти махсус сӯзишвории дизелиро гарм намуда, акумлятори онро фаъол карда, автобусро ба ҳаракат даровардаанд.

Вазорати ҳолатҳои фавқулодаи Қазоқистон таъкид кардааст, ки тайи ду рӯзи охир бар асари бориши зиёди барф ҳарорати ҳаво сард шуда, ҳаракати воситаҳои нақлиёт дар ин кишвар душвор шудааст. Дар натиҷаи он, ҳодисаҳои зиёди фавқулода ва корҳои наҷотдиҳӣ дар давоми ду рӯзи охир ба қайд гирифта шудааст.

Dialog.tj