Мақомоти Қазоқистон бо барномарезӣ дар нақша доранд, ки то соли 2029 ҳаҷми сармоягузории хориҷӣ дар иқтисодиёти кишварро ба 450 миллиард доллар афзоиш диҳанд.

Ҷумҳурии Қазоқистон ҷойгоҳи худро ҳамчун минтақаи аввалини сармоягузорӣ дар миёни кишварҳои Осиёи Марказӣ нигоҳ медорад. Гуфта мешавад, ки беш аз 60 дарсади тамоми сармоягузориҳо ба Осиёи Марказӣ дар Қазоқистон сурат мегирад. Дар ин хусус, расонаҳои қазоқистонӣ хабар медиҳанд.

Гуфта мешавад, ки барои расидан ба афзоиши сармоягузорӣ то ба андозаи 450 миллиард доллар, ҳукумати Қазоқистон дар нақша дорад, то соли 2029 боз 150 миллиард доллари дигар сармояи хориҷӣ ҷалб кунад.

Дар соли 2024 Қазоқистон ҳафт шарномаи сармоягузорӣ ба арзиши умумии 2,5 миллиард долларро ба имзо расонид. Инчунин, 107 шартномаи сармоягузорӣ ба маблағи тақрибан 8 миллиард доллар тартиб дода шудааст. 

Аз ибтидои соли 2025 то ба имрӯз аллакай шаш шартномаи сармоягузории хориҷӣ тасдиқ карда шудааст. Ҳаҷми сармоягузориҳо дар Қазоқистон ба 88 фоиз афзоиш ёфт ва ба 15,7 миллиард доллар расид.

Яке аз сармоягузориҳо аз ҷониби ширкати “UCC Holding” сурат гирифт. Ин ширкат дар ҳаҷми 11 миллиард доллар дар бунёди корхонаи коркард ва истеҳсоли газ, истгоҳҳои компрессорӣ ва лӯлаҳои гази магистарӣ сармоягузорӣ кард.

Моҳи ноябри соли  2024 ширкати “UCC Holding” музокирот анҷом дод ва барои хариди 75 фоиз саҳмияҳои гази майдони Кашаган ба созиш расид.

Тибқи иттилои Кумитаи иқтисодӣ ва иҷтимоии Созмони Милали Муттаҳид оид ба Осиё ва Уқёнуси Ором дар соли 2024 ҳаҷми сармоягузориҳои хориҷӣ дар Осиёи Миёна 27 фоиз афзоиш ёфта, ба 24, 8 миллиард доллар расидааст. Тибқи гузориши расонаҳо дар ин минтақа ду кишвар - Қазоқистон ва Ӯзбекистон ба мақсади асосии сармоягузории байналмилалӣ табдил ёфтаанд.

Дар соли 2024 ҳаҷми сармоягузориҳои “Greenfield” дар Ӯзбекистон нисбат ба соли 2023 49 дарсад коҳиш ёфта, ба 4 миллиард доллар расид. Бо ин ҳол, кишвар ба технологияҳои сабз аҳамият медиҳад. Ширкати кореягии “Western Power” 152 миллион доллар дар бунёди корхонаи биотопливо дар вилояти Фарғона сармоягузорӣ хоҳад кард.

Ворид шудани сармоягузории “Greenfield” ба Осиёи Шимолӣ ва Осиёи Миёна дар соли 2024 27 фоиз афзоиш ёфта, ба 1,1 миллиард доллар расид.

Гуфта мешавад, ки аз соли 2017 то ба имрӯз дар иқтисодиёти Ӯзбекистон дар ҳаҷми 188 миллиард доллар сармоягузорӣ ҷалб шудааст, ки 87 миллиарди онро сармоягузории хориҷӣ ташкил медиҳад.

Dialog.tj