Хадамоти алоқаи назди Ҳукумати Ҷумҳурии Тоҷикистон гуфт, ки барои шунидани арзу шикоят ва ҳалли масъалаи хизматрасонии интернет маркази нави тамос (колл-сентр) –ро роҳандозӣ кардааст.

Гуфта мешавад, ки шаҳрвандон акнун метавонанд, ба воситаи рақамҳои кӯтоҳи 40-30 оид ба ҳалли масъалаҳои хизматрасонӣ бо Хадамоти алоқа тамос гиранд ва арзу шикоят, пешниҳодҳо оид ба сифату вазъияти хизматрасониҳоро матраҳ кунанд.

Маркази тамос шабонарӯзӣ ва бидуни рӯзҳои истироҳат барои шунидани арзу шикояти шаҳрвандон оид ба хизматрасонии алоқаи мобилӣ омода аст.

Тибқи иттилои Хадамоти алоқаи Ҷумҳурии Тоҷикистон марказ аз 18-уми феврал ба фаъолият оғоз кард.

Созмондиҳандагони маркази нави тамос мегӯянд, ки фаъолияти он ягона роҳу усули муносиб барои гирифтани дархост, шикоят ва пешниҳодҳои сокинони кишвар мебошад.

Хадамоти алоқа таъкид мекунад, ки ҳадафи асосии таъсиси марказ баланд бардоштани сифат ва дастрасии хизматрасониҳои телекоммуникатсионӣ барои шаҳрвандон ва вокуниши фаврӣ ба шикоятҳову бартарафсозии мушкилоти соҳаи алоқа мебошад. Хадамоти алоқа нақша дорад ҳамкориҳои худро бо аҳолӣ беҳтар намуда, роҳи қулай ва самараноки пешниҳоди шикоят ва дархостҳоро фароҳам кунад.

Dialog.tj