Дар ҷараёни як ҷаласаи зиддикоррупсионӣ ҳафт корманди ширкатҳои энергетикии вилояти Самарқанд боздошт шудаанд. Дар ин хусус хадамоти матбуоти Вазорати энергетикаи Ӯзбекистон дар саҳифаи телеграми худ хабар додааст.

Ҳодисаи боздошти кормандони соҳаи энергетика рӯзи 14-уми феврал дар вақти баргузории ҷаласаи мубориза бо коррупсия дар соҳаи энергетика рух додааст.

Ҷаласаи мазкур зери раҳбарии муовини Прокурори генералии Ӯзбекистон Шоҳрух Аминов доир гашт.

Дар ин ҷаласа намояндагони филиалҳои минтақавӣ, ноҳиявӣ ва шаҳрии ширкатҳои “Шабакаи барқи минтақавӣ” ва “Ҳудудгазтаъминот” ширкат доштанд.

Бар асоси иттилоъ, афроди боздоштшуда дар ҷиноятҳои коррупсионӣ, аз ҷумла сӯйистифода аз ваколатҳои хизматӣ гумонбар дониста мешаванд.

Онҳоро дар толори ҷаласа ба дастонашон завлона зада, боздошт ва аз толор берун бурданд.

Дар анҷоми ҷаласа намояндагони Прокуратураи генералӣ ба раҳбарони ширкатҳои энергетика дастур доданд, ки назорати интизоми меҳнатӣ дар миёни кормадонро тақвият диҳанд ва барои мубориза бар зидди коррупсия чораҳои иловагӣ андешанд.

Dialog.tj